ئێمە لەم هەرێمە پێ بەقەد بەڕەکەی خۆمان رادەکێشین، تەماشای مەوقیعی خۆمان و توانای کۆمەمەڵگەکەمان دەکەین، دەزانین ناتوانین وەک سویسرا بین، چونکە کۆمەڵگەیەکی گەشەسەندووی لە دیموکراسی گەیشتووی وەک ئەوانمان نییە تا حزبەکانیشمان لەسەر ئاستێکی سیستماتیکی باشدا بن، هەربۆیە ئەو چاوەڕوانییەی وەک خەڵک هەمانە لە حکومەت، هێندە زۆر و زەبەلاح نین لە دەسەڵاتی حکومەتدا نەبێت جێبەجێیان بکات.
ئەوەی هەر حکومەتێک سەردەخات لەهەر وڵاتێک بێت، دانانی بەرنامەیەکی تۆکمەی پشتبەستە بەو کەرەستانەی لەبەردەمیدایە، لەسەروویانەوە ئابوورییە، بەهێزیی ئابوورییەکی پتەو واتا دابینکردنی خزمەتگوازارییەکان و لەوێشەوە پاراستنی ئاساییشی گشتی و بەڕێوەبردنێکی تەندروست.
ئەمانەش بە رێککەوتنی ئەو حزبانە دەکرێت کە کابینە حکومییەکە دروست دەکەن.
لەم هەرێمە یەکێتیی نیشتمانیی کوردستان و پارتی دیموکراتی کوردستان، پێکەوە حکومەتی نوێ دروست دەکەن و باقی حزبە براوەکانی تر، دەچنە چوار چێوەی ئۆپۆزسیۆنێکی فرە بەرەییەوە، ئەوان وەک باو هەوڵ دەدەن کارەکانی حکومەت بشێوێنن و قێزەونی بکەن لای خەڵک تا سەنگەری خۆیان خۆش بکەن و ئامادەی بکەن بۆ هەڵبژاردنێکی تر، لەبەرامبەردا دەبێت حکومەتی نوێ کە بڕیارە دوای کۆتایی جەژن پێکبهێنرێت، بەپێی لێدوانی بەرپرسانی هەردوو لا، تەباییەکی بە بەرنامە داڕێژراویان هەبێت، دوور لە قین و تۆڵەی کاتی بانگەشە، ئەوجار هەنگاو بنێن بۆ جێبەجێکردنی هەموو خواستەکانی خەڵک و روویەکی تر بدەنەوە بە حکومەت، بەجۆرێک لای خەڵک خۆشەویست بێت و بە هی خۆیانی بزانن.
نەهێشتنی گەندەڵی لەناو وەزارەتەکان، نەشکاندنی یەکتر لەناو هەموو دامودەزگاکاندا، سەپاندنی دەسەڵاتی حکومەت لە هەر گوند و شارێکی هەرێمی کوردستان وەک یەک، لەپاڵیشیدا گەیاندن و پێشکەشکردنی خزمەتگوزارییەکان بۆ هەموو کونجێکی هەرێم بە یەکسانی.
گرتنەبەری سیاسەتێکی یەکگرتوو بەرامبەر بەغدا و پرسە هەڵواسراوەکان، نوێنەرایەتی کردنی هەرێم بەیەک هەڵوێستی، دروستکردنی هاودەنگی لەنێو فراکسیونی هەردوو لا لە ئەنجومەنی نوێنەران بۆ تێپەڕاندنی هەر یاسایەک لە سوودی هەرێم بێت.
هەوڵی فەراهەمکردنی کەشی گونجاو لە کاری حزبیی ناوچەکانی ژێر دەسەڵاتی یەکتر بکرێت، رێگریی نەکرێت لە هیچ دامودەزگایەکی حزبیی یەکتر لەهەر شوێنێکی هەرێم بێت.
پێویستە تەبایی ئەم دوو حزبە لەبەرێوەبردنی هەرێم، لەبەرژەوەندیی خەڵک بێت بە گشتی، نەک بۆ بەرژەوەندیی حزبی.
حکومەت و ئیدارەدان دەبێت رەچاوی ئەوە بکات کە جێبەجێکاری یاسایە و رێکخەری ژیانی کۆمەڵگەکەیە، بۆیە دەبێت هەمووان لە سایەیدا بە یەکسانی مافەکانیان دابینبکرێت و یاساش سەروەر بێت و یەکسان بسەپێندرێت.
خەڵکی هەرێم ماوەیەکی زۆرە زویر بووە لە ئەدای حکومەت، بەتایبەتی لەرووی مووچە و کەمیی خزمەتگوزارییەکانەوە، دەکرێت حکومەتی نوێ هەنگاوی خێرا و دیار بنێت بۆ رەواندنەوەی زویرییەکانی خەڵک و چاککردنی گوزرانی خەڵک، بە گەیشتن بە هەموو رێککەوتنە داراییەکان لەگەڵ بەغدا، تا چیتر کێشەی گەورەی خەڵک مووچە نەبێت، چونکە مووچە مافێکە بەو کەسە دەدرێت کە کار لە فەرمانگەیەکی حکومەتدا دەکات، ئیتر ئەمە خێر پێکردن نییە و سیفەتی باشیی حکومەتیش نییە، بەڵکو ئەرکی لە پێشینەیەتی و دەبێت وەک دەستکەوت حسابی بۆ نەکات، بەڵکو وەک ئەرک بۆی بڕوانێت و دابینیبکات.
