گرنگیی دووەم دیداری گشتی یەکێتی لە کەرکوک

خۆشبەختانە کاروانی دووەم دیداری گشتی یەکێتی، لەسەر ئاستی شار و شارۆچکەکان و زۆربەی هەرە زۆری ئۆرگانەکانی یەکێتی رووی لە کۆتاییە، لە ماوەی رابردوودا هەڤاڵانی سەروکاری دیدار، زۆر ماندوونەناسانە و بەسەلیقەوە، شەمەندەفەری ئەم مۆدیلە نوێیەی خەباتی یەکێتییان گەیاندە زۆرترین ناوچە و دەڤەری کوردستان، زۆرترین گفتوگۆ و دیالۆگ و راسپاردە و پێشنیار گەڵاڵە کراون و هەگبەی دیداری تەواو پێ دەوڵەمەند کراوە .

کەرکوک و خورماتوو
ئێمە وا خەریکە وردە وردە لە کۆتاییهاتنی یەکەم قۆناغی دووەم دیداری گشتی یەکێتی نزیک دەبینەوە، تا رادەیەک کەرکوک و دەوروبەری و قەزای خورماتوو دەبنە دوا ویستگەکانی ئەم قۆناغە .
راستە هەموو شار و شارۆچکەکان و تەواوی ئۆرگانەکانی یەکێتی گرنگن و جێگای بایەخن، بەڵام کەرکوک  و خورماتوو و ناوچە جێناکۆکەکان لەبەر زۆر هۆکاری خودی و بابەتی، بایەخ و هەستیاری و گرنگی زیاتریان هەیە، بوونی ململانێی نەتەوەیی و تائیفی وحزبی و سیاسی، جێبەجێ نەکردنی مادەی (140)ی دەستووری عیراق و یەکلانەبوونەوەی چارەنووسی نەتەوەیی و سیاسیی وکارگێڕێ ئەو ناوچانە، گرفتێکی گەورەی بۆ ناسنامە و دانیشتوانی ئەو سنوورە دروستکردووە، هەربۆیە گرنگیی  دۆخی کارگێڕی و سیاسی ئەو شارانە بۆ کورد و بۆ یەکێتی،  جێگای  بایەخن و بابەتێکی هێجگار ستراتیژین.
من دەزانم بۆ بابەتە حزبی و رێکخراوەییەکان هەڤاڵان و ئۆرگانەکانی ئەو سنوورە، راسپاردە و پێشنیاری گونجاویان پێیە و نامەوێت لێرەدا ئاماژەیان بۆ بکەم .

رەهەندی نەتەوەیی و سیاسی و خزمەتگوزاری  
ئەوەی لای بەندە گرنگە دیدار ئەمجارە کاری لەسەر بکات بۆ ئەو سنوورە،  ئەم بابەت و تەوەرانەی لای خوارەوەیە، کە رەهەندێکی نەتەوەیی و سیاسی و خزمەتگوزارییان  هەیە و بریتین لە:
یەکەم- خوێندنی کوردی: دیارە یەکێک لەو بابەتە گرنگانەی کە زۆر پێویستە جەختی لەسەر بکرێتەوە، دیدار پرۆژە و پێشنیاری گونجاوی پێ بێت بۆ تیمی یەکێتی لە حکومەت، بابەتی پرۆسەی خوێندنی کوردییە، کە جێگای داخە ساڵ لە دوای ساڵ ئەم پرۆسەیە لە رووی چەندایەتی و چۆنایەتییەوە رووی لە لاوازی و پاشەکشە کردووە، هۆکارەکەشی ئەگەر تەنها جارێک لەئەستۆی حکومەتی ناوەندی بێت، ئەوا دەیان جار لە ئەستۆی حکومەتی هەرێمی کوردستانە، بۆیە دەستگرتن بە پرۆسەی خوێندنی کوردییەوە لەو ناوچانە،  دەستگرتنە بە مانەوەی پایەکانی کوردبوون.
دووەم- بواری رۆشنبیری و هونەری: ئەم بوارە بۆ زیندووهێشتنەوەی هەر نەتەوە و پێکهاتەیەک، بەتایبەتی لە قۆناغی ململانێدا، بابەتێکی زۆر گرنگە، پیویست دەکات لەم بارەوە دیدار پێشنیار و راسپاردەی خۆی هەبێت، بۆ ئەوەی لەڕێگای حکومەتەوە گرنگی بە هونەر و رۆشنبیری کوردی لەو سنوورە بدرێت، چونکە زۆربەی ئاماژەکان جەخت لەوە دەکەنەوە،  ئەم بوارەش هاوشانی بواری پەروەردە و خوێندنی کوردی لەو سنوورە پاشەکشەی کردووە .
سێهەم- گرنگی میدیایی: میدیا بە بینراو و بیستراو، رۆڵێکی گرنگ دەگێڕێت بۆ زیندووهێشتنەوەی تایبەتمەندی و رەسەنایەتی کورد لەو سنوورە، فراوانکردنی چالاکییە میدیایەکانە بۆ کەرکوک و خورماتوو، کە بابەتێکی هەنوکەییە بۆ بەرز راگرتنی یاد و بۆنە و کەلتوور و مێژووی کورد ، ئەگەرچی یەکێتی لەم بوارەدا پێشەنگ بووە، بەڵام دەیهێنێت لەم رووەوە کاری زیاتر بکرێت و نەهێڵرێت دابڕان دروست ببێت.
چوارەم- وەرزش: ئێستا لە دنیادا وەرزش بووە بە کایەیەکی هێجگار گرنگ و جێ بایەخی گەلان، سەرەڕای کەم دەرفەتی و کەم بواری وەرزش لای ئێمەی کورد تا دێت بایەخی زیاتر پەیدا دەکات، بەتایبەتریش لەناوچە جێ ناکۆکەکان، بۆ ئەمەش گرنگە یەکێتی هەم وەکو حزب وهەمیش وەک حکومەت، گرنگی زیاتر بەم بوارە بدات، وەک دروستکردن و نۆژەنکردنەوە و دابینکردنی تەواوی پیداویستییەکان بۆ ئەم بوارە .

کاری جددی لەسەر بکرێت
دیارە بە هۆکاری جیاجیا، ئەم بابەتانەی لەناوچە جێ ناکۆکەکان رووی لە پاشەکشەو لاوازی کردووە و پێویستە ئیتر رێگە لەو پاشەکشەیە بگیرێت، چونکە بەئاست و قەبارەی جیاجیا کاریگەری لەسەر بوون و قەبارە و پێگەی کورد دەکات، ئومێد دەکەم دیدار ئەم چوار تەوەرەی سەرەوە، بکاتە بابەتی گرنگی پێدراو و کاری جددیشی لەسەر بکرێت.

کەرکوک و خورماتوو و ناوچە جێناکۆکەکان گرنگی تایبەتییان هەیە لای یەکێتی