دواكەوتن یان نەدانی مووچە، دابین نەکردنی خزمەتگوزارییە بنەڕەتییەكان وەك پێویست و گرانیی نرخەکان وەک (كارەبا، سووتەمەنی، ئاو، رێگاوبان، سزاكانی هاتوچۆ)، كاریگەریی خراپی لەسەر خەڵك دروستکردووە.
ئێستا چاوەڕوانین حكومەتێك پێكبێت كە ئەوانە بە واقیعی و دروستی چارەسەر بكات، نەوەك هەر بە قسە و شێوازی لەخشتەبردن و بانگەشەی جاران.
بەهۆی ناكۆكیی قووڵ لەگەڵ بەغدا و گۆڕانكاریی خێرا و دراماتیكی ناوچەكە، ئیتر ناشێت حكومڕانی وەك جاران بەڕێوەببرێت و دەبێت گۆڕانکاریی بنەڕەتیی بەسەردا بێت بە جۆرێک جیاواز بێت لەوانەی پێشوو.
داننان بە كەلێنەكاندا و هەوڵی چاككردنیان و راكێشانەوەی متمانەی جەماوەر، نەک بە خۆدەرخستن و شێواز و سیاسەتی كۆن و خۆ نیشاندان وەك لایەنی سەركەوتوو.
بەردەوامبوون لەسەر هەمان رەوتی كار و خۆدزینەوە و شان خاڵیکردنەوە لە هەڵگرتنی بەشێك لە بەرپرسیارێتیی دۆخەكە و تاوانبارکردنی بەغدا دادی دۆخەکە نادات و نەك هەر سوودی نابێت، بەڵكو زیانی زیاترە و هاووڵاتیان زیاتر تووڕە دەكات.
لەگەڵ ئەو مەترسی و هاوكێشانەی رووبەڕووی ناوچەكە بوونەتەوە، كورد دەبێت لە ناوخۆدا یەكگرتوو بێت، دەسەڵات كارێك بكات هاووڵاتیان پشتیوانیی لێبکەن لە هەنگاوەكانیدا، ئەوەش بە راستكردنەوەی لار و لەوێرییەکان دەبێت، نەك پەردەپۆشکردن و بەردەوامبوون و رێکردن لەسەر هەمان رێڕەوی هەڵەی پێشوو، بەڵکو دەبێت لەسەر بناغەی كارنامەی گونجاو و سووربوون لەسەر داوا و پێداویستییەکانی خەڵك رێڕەوەکە راست بکرێتەوە.
وەک دەبینین لە سەروبەندی هەڵبژاردنەکاندا هەر حزب و لایەنە و كۆمەڵێك دروشم و بەڵێنیان بە هاووڵاتیان داوە و خەڵكیش لەسەر ئەو بنەمایە دەنگیان بە لایەنی دڵخوازی خۆیان داوە، بەڵام چاوەڕوانی جێبەجێکردنی ئەو بەڵێنانەیان لێ دەکەن.
بەهۆی ناكۆكیی قووڵ لەگەڵ بەغدا و گۆڕانكارییە خێرا و دراماتیكییەکانی ناوچەكە، ناشێت چیتر حوكمڕانیی وەك جاران بکرێت و دەبێت گۆڕانکاریی بنەڕەتیی بەسەردا بێت
وەک ئەنجامەکانی هەڵبژاردنیش دەریانخستووە پارتی و یەکێتی بەهۆی چەند فاكتەرێكەوە، توانای دامەزراندنی حكومەتییان بەبێ یەكتری نییە، بۆیە خەڵك دەیەوێت مادام ئەنجامەکان بەو شێوەیەن لێکتێگەیشتن هەبێت لەنێوان ئەو دوو لایەنەدا و حكومەتێكی خزمەتگوزاری كارا بهێننە كایەوە، یەكێتیش بەرنامەی خۆی بۆ پێکهێنانی حكومەت کردووەتە سەنگی مەحەك کە دەنگدەرەکانیشی چاوەڕێی ئەوەن، لەبەرئەوەی هەڵبژاردنی پەرلەمانی عیراقیش نزیكە، بۆیە دەبێت لەسەر بەرنامەی خزمەتکردنی خەڵك و بە ئاڕاستەی جێبەجیكردنی بەشێك لە داوایی و خواستەکانیان لەگەڵ پارتیدا رێكبكەوێت.
داوای خەڵك، سادە و ئاسانە، لەوانە (جێگیركردنی مووچە، بۆئەوەی هەموو مانگێك كێشمەكێش دروست نەبێت). كەمكردنەوەی نرخی كارەبا و خزمەتگوزارییەكانی تر. نەسپاردنی خزمەتگوزارییە بنەڕەتییەكان بە كۆمپانیاكانی كەرتی تایبەت بۆ نەڕوتاندنەوەی زیاتری خەڵك، جێگیركردنی بازاڕ، رێگری لە قۆرخكاری، پەیڕەوکردنی شەفافییەت لە خستنەڕووی داهات و خەرجییەكاندا و چیتریش رێگە نەدرێت بە دەستبەسەرداگرتنی سامانی گشتی.
رێكخستنی هەناردە و هاوردە و كار لەسەر سێکتەرە گشتییەكان بە شێوەی شەفافانە، چارەسەرکردنی بێكاری، بەم هەنگاوانە خەڵك پشتگیریی هەنگاوەکانی حکومەتی داهاتوو دەكات.
ئەگەر یەكێتی پێداگری لەسەر ئەوانە بكات و بیكات، هەم خزمەت بە جەماوەرەکەی و هەم خزمەت بە کۆی هاووڵاتیان دەكات و بەڵێنەكانی بەدیدەهێنێت، بۆ هەڵبژاردنەكانی داهاتووش پێگەی خۆی قایمتر و بەهێزتر دەکات.
