‎مەترسییەكانی گۆڕینی دەستووری عیراق

09:54 - 2022-08-04
‎‎سۆزان حەمە تاتە
113 خوێندراوەتەوە

گۆڕینی دەستوور و سیستمی حکومڕانی عیراق ئەگەر سازانی لەسەر نەکرێت ئەوا زیانی گەورە بە کورد و مافەکانی دەگەیەنێت

‎مانگرتنی ئەم دواییەی لایەنگرانی رەوتی سەدر لە مەبەستە سەرەکییەکەیەوە گۆڕاوە بۆ گۆڕینی سیستمی سیاسی و دەستووری عیراق، ئەمەش پێشهاتێکی مەترسیدارە چونکە، دەستووری هەمیشەیی عیراق كەوا لە راپرسییەكی گشتیدا لە ساڵی 2005 پەسندكرا، بەشێكی باشی داواكارییەكانی خەڵكی كوردستانی تێدایە، لە سەرووی هەموویانە ناسینی هەرێمی كوردستان وەكو هەرێمێكی فیدراڵی و قەوارەیەكی دەستووریی كە ئەوە تائەندازەیەك دەستكەوتێكی سیاسی و دەستووریی باشە و دەكرێ ئەگەر باش مامەڵەی لەگەڵ بكرێت ببێتە بنەمایەكی باش بۆ قەوارەیەكی لەمە باشتر لە داهاتوودا.
‎چەند ساڵێكە بە نهێنی و ئاشكرا و ناوەناوە باسی گۆڕینی هەندێك مادەی دەستووری هەمیشەیی عیراق دەكرێ، لەسەر ئاستی سیاسی بەشێك لە سوننە و شیعەکانیش ناوبەناو باس لە گۆڕینی دەستوور دەکەن.
 ئەوان دەیانەوێت هەرێمی كوردستان بگۆڕن بۆ باكووری عیراق و وەكو چەند پارێزگایەك مامەڵەی لەگەڵدا بكرێت كە ئەمەش مەترسیی دەبێت بۆ شووناسی نەتەوەیی كورد.
‎بارودۆخی ساڵی 2005 و نووسینەوەی دەستووری هەمیشەیی عیراق و پەسندكردنی لە بارودۆخی ئێستا جیاوازن، ئەوكات سەرەتای پڕۆسەی ئازادی عیراق بوو، بەشێکی زۆری سەرکردەی لایەنە ئۆپۆزسیونەکانی پێشوو قەرزار و دۆستی کورد بوون.
 رۆڵی سەرۆك مام جەلال و لەگەڵیشدا تائەندازەیەكی زۆر یەكگرتوویی هێزە كوردستانییەكان لەوكاتەدا هۆكاری ئەوەبوون فیدراڵی بچەسپێ و دیموكراسی و مافی مرۆڤ و تەوافق ببێتە بنەمایەكی دەستووریی باش بۆ تێپەڕاندنی كێشەكان.
‎بارودۆخی ئێستا بۆ كورد خراپە ئەگەر سیستمی سیاسی بگۆڕێت یان دەستوور بەرەو هەمواركردنەوە ببرێت، راستە ئەوە پڕۆسەیەكی دوورودرێژە و كاتی زۆری دەوێت، بەڵام هەر خودی ئەو دروشم و داوایە ویستێکی سیاسییە کە ئێستاش بەدینەیەت بەڵام دەبێتە ستراتیژیی دوورمەوداو و كاری جدی بۆ دەكرێت.
‎گۆڕینی دەستوور لەم دۆخەشدا كەوا هێزەكانی كوردستان یەكگرتوو نین دیسانەوە مەترسییەكە گەورەتر دەكات، جیاوازی دەنگ و كورسیی پەرلەمان و پەیڕەوكردن لە سیاسەتی زۆرینە و كەمینە لە پەرلەماندا هەموویان مەترسیی جدین و ناكرێت فەرامۆش بكرێن، هەروەها فەرامۆشكردن و نەگرتنەبەری پلانی ئەی و بی و سی بۆ هەر ئەگەرێك دیسانەوە مەترسییەكان گەورەتر دەكەن لەسەر هەرێمی كوردستان و قەوارە دەستوورییەكەی.

وتارەکانی نوسەر