ئا: ئەرکان جەبار
راوێژكارێكی سەرۆك وەزیرانی عیراق ئاماژە بەوەدەكات: بڕیارەكانی دادگای فیدراڵی سەبارەت بە رێكخستنی سامانە سروشتییەكانی هەرێمی كوردستان و بەتایبەت نەوت، قابیلی گفتوگۆكردن نییە.
هاوكات، وەزیری نەوتی عیراق رایگەیاندووە: «داهاتی نەوتی هەرێم روون و ئاشكرا نییە و (50 %)ی نرخی نەوتی فرۆشراو دابین ناكەن».
حكومەتی هەرێمی كوردستانیش لە رێگەی سەرۆكی دیوانی سەرۆكایەتیی ئەنجومەنی وەزیرانەوە، وەڵامی پەیامەكەی وەزیری نەوتی عیراق دەداتەوە و رایدەگەیەنێت: «كۆتایی ئەم هەفتەیە بە رەسمی وەڵامی وەزارەتی نەوتی عیراق دەدەینەوە».
״یاسای بودجە كێشەكە یەكلایی ناكاتەوە״
هەیسەم جبوری، راوێژكاری تەكنیكی سەرۆك وەزیرانی عیراق، لە چاوپێكەوتنێكیدا لەگەڵ كەناڵی رەسمی «عیراقییە» رایگەیاندووە: حكومەت و ئەنجومەنی نوێنەران مافی ئەوەیان نییە دەستبەرداری بڕیارەكەی دادگای فیدراڵی بن سەبارەت بە بەڕێوەبردنی سەروەت و سامانی هەرێمی كوردستان یاخود سازشی لەسەر بكەن، چونكە بڕیارەكە قابیلی گفتوگۆكردن نییە، لەگەڵ ئەوەشدا هەرێم مافی ئەوەی نییە كە بیر لەوە بكاتەوە بڕیارەكە جێبەجێدەكات یان نا، چونكە بڕیاری دادگای فیدراڵی یەكلاكەرەوەیە و بۆ جێبەجێكردنە.
راشیگەیاندووە: بودجەی گشتیی عیراق ناتوانێت ببێتە چارەسەرێك بۆ ناكۆكییەكانی نێوان بەغدا و هەرێم، چونكە بڕگە و مادەكانی بە تەواوی جێبەجێناكرێن، ناشتوانرێت بودجەكە بە یاسایی بكرێت بەبێ جێبەجێكردنی بڕیاری دادگای فیدراڵی یاخود یاسایەك دەربكرێت تایبەت بە نەوتی هەرێم.
دوا پەیامی وەزیری نەوتی عیراق
هاوكات، وەزیری نەوتی عیراق رایگەیاند: داهاتی نەوتی هەرێم روون و ئاشكرا نییە، بەشێوەیەك (50 %)ی نرخی نەوتی فرۆشراو دابین ناكات و دەشڵێت: «دوای جێبەجێكردنی بڕیارەكانی دادگای فیدراڵی، ئامادەین گفتوگۆ لەگەڵ هەرێم بكەین».
ئیحسان عەبدولجەبار، وەزیری نەوتی عیراق ئاماژەی بەوەشكردووە: بەهۆی كێشەی نەوتی هەرێمەوە، ناتوانن خواستی كڕیارەكانی ئۆپیك دابین بكەن و ئەوەی هەرێمی كوردستان لە فرۆشتنی نەوتدا دەیكات، لە هیچ وڵاتێكدا بوونی نییە.
دەشڵێت: «ئیدارەدانی مەلەفی نەوت لە هەرێم نادروستە و پێویستە ئیدارەدانی نەوتی هەرێم بە هاوبەشی بێت لەگەڵ عیراقدا، بەجۆرێك دەمانەوێت دۆسێی نەوتی هەرێم لەلایەن كۆمپانیایەكی سەر بە حكومەتی فیدراڵەوە ئیدارە بدرێت».
لەبارەی بڕیارەكانی دادگای فیدراڵییەوە، باسی لەوەكردووە: بڕیارەكانی دادگای فیدراڵی لەبارەی فرۆشتنی نەوتی هەرێمەوە هاوتایە لەگەڵ دەستووری عیراق، بۆیە میزاجی سیاسی ناتوانێت بڕیار لە بازرگانی نەوت بدات.
وتیشی: «لە هیچ وڵاتێكدا نەبووە دوو سیاسەتی نەوتی هەبێت لە یەك كاتدا و ئەم جیاوازییەی نێوان حكومەتی فیدراڵ و هەرێم لە مامەڵەكردن لەگەڵ سۆمۆدا، كێشەی بۆ حكومەتی عیراق دروستكردووە».
رۆژی 15ی 2ی 2022، دادگای باڵای فیدراڵی عیراق بڕیاریدا كە یاسای فرۆشتنی نەوت و غاز لەلایەن حكومەتی هەرێمەوە نا دەستوورییە و دەبێت حكومەتی هەرێم پابەندی دەستوور بێت.
لە بەشێكی دیكەی بڕیارەكەی دادگای فیدراڵیدا هاتبوو: «دەبێت وەزارەتی دارایی و دیوانی چاودێری دارایی فیدراڵ، بە وردی چاودێریی گرێبەست و داهاتی فرۆشتنی نەوت و غازی هەرێم بكەن و لە بەرامبەردا هەرێم پابەند دەكرێت بە سەرجەم بڕیارەكانەوە».
حكومەتی هەرێم وەڵام دەداتەوە
لای خۆیەوە، ئومێد سەباح سەرۆكی دیوانی سەرۆكایەتیی ئەنجومەنی وەزیران لە پەیامێكی ڤیدیۆییدا رایگەیاند: دوای كۆبوونەوەی وەفدی حكومەتی هەرێم لەگەڵ وەزارەتی نەوتی عیراق، ئەو وەزارەتە پرۆپۆزەڵێكیان بۆ حكومەتی هەرێم ناردووە و ئێستاش خوێندنەوە بۆ ئەو پرۆپۆزەڵە دەكەین، تا كۆتایی ئەم هەفتەیەش وەڵامی رەسمیمان دەبێت.
ئاماژەی بەوەشداوە: لە چوارچێوەی دەستوور، كاركردن و گفتوگۆی حكومەتی هەرێم و فیدراڵ بەردەوام دەبێت.
