هونەرمەندی دەنگخۆشی كورد حەسەن دەرزی كوڕی سەلیم ساڵی 1957 لە شاری بۆكان لە رۆژهەڵاتی كوردستان لە دایكبووە. بنەماڵەكەیان سەر بە هۆزی فەیزوڵڵابەگییە كە یەكێكە لە هۆزە ناودار و خۆشناوەكانی ناوچەی موكریان.
هەر لە تەمەنی منداڵییەوە هۆگری گۆرانی وتن و موزیك دەبێت و دەڵێت:
محەمەدی برای دەنگی زۆر خۆش بووە و كاریگەرییەكی زۆری لەسەر داناوە و لە راستیدا یەكەم مامۆستای بووە لە بواری هونەردا و هەر ئەویش هاندەری بووە بۆ ئەوەی بێتە ناو جیهانی موزیك و گۆرانییە، هەرچەند محەمەدی برای نەیتوانیوە بەهۆی بارودۆخی ژیانەوە درێژە بە هونەرەكەی بدات.
لە لێدوانێكی تایبەتدا، هونەرمەند حەسەن دەرزی بە دوالاپەڕەی راگەیاند: هەر لە منداڵییەوە گوێم بە دەنگی مامۆستا حەسەن زیرەك كراوەتەوە و زۆر هۆگری دەنگی زیرەكی نەمرم.
حەسەن دەرزی وتیشی: وێڕای ئەوەی كە گۆرانی چڕیوە، كەمانیشی ژەنیوە و ئەو هونەرەش لەلای مامۆستایان ئەمیری مینایی و رەشیدی فەیزی نەژاد فێر بووە.
هونەرمەند حەسەن دەرزی ئاماژەی بەوەشكرد كە تا ئێستا نزیكەی 70 گۆرانی تۆمار كردووە و خاوەنی پێنج ئەلبومی گۆرانییە و شەشەمین ئەلبومیشی بەڕێوەیە و هەنووكەش نزیكەی 15 گۆرانی ئامادەیە و چاوەڕێی هیممەت و هاوكاری لایەنە پەیوەندیدارەكان دەكات بۆ ئەوەی بتوانێت تۆماریان بكات و پێشكەشی هەوادارانی بكات.
هونەرمەند بۆ ماوەی 26 ساڵ وەك مامۆستا لە ناوەندەكانی خوێندن لە شاری بۆكان وانەی وتۆتەوە و بە هۆی دۆخی سیاسییەوە رێگەی هەندەرانی گرتۆتەبەر و لە ساڵانی نەوەدەكانەوە لە بەریتانیا دەژی و ئاواتەخوازە بێتەوە هەرێم و كۆنسێرتێك بۆ شەیدایانی گۆرانی رەسەنی كورد بەڕێوەببات.
جەواد حەیدەری
