سەرۆک بافڵ: یەکێتی پارێزەر و بەردەوامیپێدەری ئەو سیاسەتە دەبێت کە مام پەیڕەوی دەکرد

12:50 - 2023-10-03
کوردستان
307 جار خوێندراوەتەوە

ئەمڕۆ بە خەمێکی قووڵ و شانازییەکی زۆرەوە یادی شکۆی نەتەوە و نیشتمان دەکەینەوە، یادی سەرۆکێک دەکەینەوە کە ژیانی خۆی پێشکەشی نیشتمان کرد و رۆژەکانی تەمەنی لەپێناوی ئاشتی، ئازادی، دیموکراسی و مافی مرۆڤدا بەسەربرد.
دڵتەنگین کە كوردستان سەرکردەیەکی خەمخۆر، بەرگریکار، دڵسۆز و بەوەفا و عیراق بونیادنەر و چەترێکی کۆکەرەوەی لەدەست دا، شانازیش دەکەین کە رێبازێکی بۆ بەجێهیشتن کە بۆ هەمیشە چرای رێگە و رێنیشاندەرمان دەبێت لەپێناوی بەدەستهێنانی مافە رەواکانی گەلی کورد و بونیادنانی وڵاتێکدا کە تاکەکانی سەربەرزانە و ئازادانە بژین.
ئێمە یادی سەرۆک مام جەلال دەکەینەوە، یادی ئەو سەرۆکەی خەمی کوردستانی لە شان گرتبوو و لەپێناوی ئازادی و سەرفرازیی میللەتێکی ستەمدیدەدا خەباتی بێوچانی کرد، خەباتێک کە تاوەکو کۆچیشی کرد بەردەوام و بێبڕانەوە بوو. یادی سەرۆکێک دەکەینەوە کە بونیادنەری عیراقی نوێ و چەتری کۆکەرەوەی ئەو دەنگ و رەنگە جیاوازانە بوو کە تەنیا لە سایەی ئەودا کۆدەبوونەوە.
ئەمڕۆ سوێند و بەڵێنی هەمیشەییمان بۆ سەرۆک مام جەلال دووپات دەکەینەوە کە وەکچۆن لە رابردوودا درێژەمان بە رێبازەکەی داوە، لە داهاتووشدا بە سوودوەرگرتن لە سیاسەتی حەکیمانە و شوێنپێی ئەودا هەنگاو بنێین و لەپێناوی سەرفرازیی کورد، فراوانکردنی سنوورەکانی ئازادی و دیموکراسی، کۆکردنەوەی جیاوازییەکان و یەکخستنی هەوڵەکاندا درێژە بە خەباتی خۆمان بدەین و مێژوویەک بنووسینەوە کە رۆحی سەرۆک مام جەلال شاد بکەین و ئەو شانازییە بە خۆمان رەوا ببینین کە هەڵگری ئەو سیاسەتە تەندروست و حەکیمانەیە بین.
بەناوی هەڤاڵانی نوێی ئەنجومەنی سەرکردایەتی و هەموو تێکۆشەرانی یەکێتییەوە بەڵێن دەدەین، یەکێتیی نیشتمانیی کوردستان پارێزەر و بەردەوامیپێدەری ئەو سیاسەتە دەبێت کە مام پەیڕەوی دەکرد، دەستی ئاشتی و پێکەوەیی بۆ هەموو لایەک درێژ دەکەین و جیاوازییەکان دەخەینە خزمەت بەدیهێنانی ئامانجە باڵاکانەوە. بەبێ بیرکردنەوەی حزبی و دوور لە هەموو بەرژەوەندییەکی تایبەت، لەپێناوی بەدیهێنانی داهاتوویەکی ئارام و سەقامگیردا تێدەکۆشین و هەوڵەکانمان لەپێناوی یەکڕیزی و یەکگرتوویی گەلی کورد دا دەبێت. بۆ بەدیهێنانی خۆشگوزەرانی هاوکار دەبین و بۆ بەرگری لە کوردستان فیداکار دەبین.
دروود بۆ رۆحی سەرۆک مام جەلال.. ئاشتی و ئاوەدانی بۆ کوردستان و عیراق
بافڵ جەلال تاڵەبانی
سەرۆکی یەکێتیی نیشتمانیی کوردستان

#مام جەلال #بافڵ جەلال تاڵەبانی #یەکێتیی نیشتمانیی کوردستان

بابەتە پەیوەندیدارەکان