هەر كورد بووین و هەر كورد ئەبین

10:31 - 2024-04-25
کوردستان
209 جار خوێندراوەتەوە

هۆنراوەكە هی خوالێخۆشبوو م.ئیبراهیم ئەحمەد-ە، بەڵام دەقێكە نەگۆڕو نەمر، لە سەرەتاوە بۆ كۆتایی ئیشكردنە لەناو سیستەمێكی ناولێناندا كە داكۆكییە لە كوردبوون. ئەم هۆنراوەیە، كاتێك لە لایەن نەوەیەكی خوالێخۆشبووەوە، لەكات و شوێنی تری جیاوازدا بیردەخرێتەوە، كاتێك سەرۆكی یەكێتی، لە رێوڕەسمی خەڵاتی زێڕینی بلەدا، بە جۆشەوە دەیڵێتەوە، بێ پەیام نییە. لە ئێستای ناوچەكەدا هەوڵ زۆرە كە كورد نەك هەر تێكبەربێت، بەڵكو خۆی نەبێت و تەنها ستراتیژی ئەوانیتر جێبەجێبكات، ئەمەش هەڕەشەیە بۆ سەر تایبەتمەندی و ناسنامە.
پێش نزیكەی دوو مانگ، لەناو دڵی بەغدادا، بە ئامادەبوونی سەركردەكانی چوارچێوەی هەماهەنگی، بافڵ تاڵەبانی، لە كۆڕبەندی رافیدەیندا بۆ دیالۆگ، راشكاوانە وتی: پێویستە لەو بیرۆكەیە تێبگەین كە هێزەكانی ئەمریكا لەناو هاوپەیمانیی نێودەوڵەتیدا داگیركەرنین، دەبێت وایان لێبكەین هەست بە سەلامەتی بكەن و پێویستیشمان پێیانە. ئەمە هەڵوێستێكی بوێرانە بوو، بەڵام هاوكات گوزارشت بوو لە تایبەتمەندیی دۆخی كورد و رێگەیەكی پاراستنی. كاتێك لە ئەنجومەنی نوێنەرانی عیراقیشدا ویسترا دانیشتنێك بۆ بڕیاری دەركردنی هێزەكانی هاوپەیمانان بكرێت، پاڵپشتیی بایكۆتی فراكسیۆنەكەی بوو بۆ ئەو دانیشتنە. لە پێشێلكارییەكانی سەروەریی هەرێم و عیراقیشدا لەلایەن وڵاتانی هەرێمایەتییەوە، هەم خۆی و هەم (ی.ن.ك)یش، هەڵوێستی روون و كوردانەیان هەیە، بگرە یەكێتی، لەم پێناوەدا دەمێكە یان لەژێر فشاردایە، یان سزای سیاسی و ئابووری دەدرێت و بە خۆڕاگری ماوەتەوە.
سەرۆكی یەكێتی، بە بەردەوامی دەستپێشخەریشی هەیە بۆ ئەوەی لەگەڵ (پ.د.ك) و هێزە كوردستانییەكاندا، هەلومەرجێك لە تەبایی هەبێت، بەتایبەتی كە كوردبوون، لەناو ئەم دۆخە ئاڵۆزە ناوخۆیی و هەرێمایەتییەدا، وەك ترافیكە لەناو كێڵگەی میندا، بەڵام خۆ ئەگەر ئەمە پرۆژەیەكی ئاوها قورسیش بێت، ناڕەوا نییە. كورد نە عەرەبە، نە ئێرانی و نە توركێكی شاخستانی، باوەڕیشی وایە كە گەلان هەموو برای ئەون، وەبیرهێنانەوەی ئەم راستییانەش، لەكایەی سیاسیدا، هەم ئەركێكی نەتەوەییە و هەم رێگەیەكیشە بۆ پێكەوە ژیان، بێگومان كاراكتەری بوێری خۆیشی دەوێت كە ناوبەناو گوزارشتی لێبكات.

#سەروتار

بابەتە پەیوەندیدارەکان