سیستمی رۆژووی پچڕ پچڕ

كوردەوان محەمەد سەعید

سیستمی رۆژی پچڕپچڕ تەنیا رێجیمێكی خۆراكیی نییە بۆ ماوەیەكی دیاریكراو و ئامانجێكی دیاریكراو، بەڵكو دەكرێ شێوازی خواردن بێت بە درێژایی ژیان، لە هەمان كاتیشدا بەشێكە لە رێجیمی خواردن بۆ كەمكردنەوەی چەوری لەش و كەمكردنەوەی كێش، شێوازی كاركردنیشی بەم جۆرەیە: مرۆڤ لەوكاتەوەی كە دەست بە خواردن دەكات بۆ سێ تا پێنج سەعات لەشی بەردەوام دەبێت لە وەرگرتنی خواردن و مژینی لەلایەن ریخۆڵەكانەوە، لەبەرئەوە لەو ماوەیەدا رێژەی ئەنسۆلین بەرزە و لەش ناتوانێ چەوری بسووتێنێت، هەر بۆیە هەشت بۆ 12 سەعات دوای ئەو قۆناغە لەش دەكەوێتە قۆناغی رۆژووەوە و دەست بە سووتاندنی چەوری دەكات، رۆژووی پچڕ پچڕیش چەند جۆرێكی هەیە كە دیارترینیان ئەمانەن:
رۆژووی رۆژانە
ئەم جۆرە لە رۆژوو كە پێی دەوترێت هەشت بە شازدە، لە رۆژێكدا هەشت سەعات دادەنێیت بۆ خواردن 16 سەعاتەكەی دیكە بەڕۆژوو دەبیت، گرنگ نییە چۆن دابەشی دەكەیت، دەتوانی لە هەشتی بەیانییەوە تا چواری ئێوارە بۆ نانخواردن تەرخان بكەیت، یان لە دووی دوانیوەڕۆ دەست بە خواردن بكەیت تا 10ی شەو، ئەم شێوازە بەناوبانگترین جۆری رۆژووی پچڕ پچڕە لەسەر ئاستی جیهان و ئاسانیشە، لەبەرئەوەی هەموو رۆژێك دووبارە دەبێتەوە و زۆر بە ئاسانیش مرۆڤ لەسەر ئەو خشتەی نانخواردنە رادێت، چونكە لەم شێوازەدا تۆ هەموو رۆژێك لەكاتی دیاریكراودا نانی خۆت دەخۆیت و تەنیا لە چەند كاتێكی دیاریكراودا نان ناخۆیت.
رۆژووی هەفتانە
رەنگە باشترین شێواز بۆ دەستپێكردنی رۆژوو یان رێجیم، سەرەتا یەك رۆژ بێت لە هەفتەیەكدا، یان یەك رۆژ لە مانگێكدا، بۆ نموونە با وای دابنێین لە دوای نانخواردنی نیوەڕی دووشەممەوە تۆ بەڕۆژوو دەبیت تا نانخواردنی نیوەڕۆی سێشەممە، لەم جۆرەیاندا تۆ كێشت كەم ناكات، بەڵام رۆژووەكەت سوودی دیكەی تەندروستی هەیە، ئەم جۆرە رۆژووە بۆ ئەو كەسانە باشە كە نایانەوێ كێشیان كەم بكات، یان دەیانەوێ كێشی خۆیان لەو ئاستەی تیایدان راگرن. جگە لەوەش یەكێك لە گرنگترین سوودەكانی ئەم جۆرە رۆژووە ئەوەیە كە ئەگەر توانیت یەك رۆژ بەڕۆژوو بیت لەوە تێدەگەیت ئەگەر رۆژێك نان نەخۆیت لە برسا نامریت.
رۆژووی رۆژ نا رۆژ
لەم جۆرە رۆژووەدا تۆ دەتوانیت، بۆ نموونە ئێوارەی رۆژی دووشەممە نان بخۆیت، دوای ئەوە بەڕۆژوو دەبیت تا ئێوارەی سێشەممە، پاشان رۆژی چوارشەممەش بەڕۆژوو نابیت، بەڵام 24 سەعاتی دوای ئەو بەڕۆژوو دەبیت، ئەم جۆرە لە رۆژوو كاتەكەی دوور و درێژە و لە هەمانكاتیشدا هەموو رۆژێك بە لانی كەمەوە ژەمێك خواردن دەخۆیت، واتە ئەو رۆژانەش كە بەڕۆژوویت ئێوارەكەی نان دەخۆیت، بەڵام ئەم جۆرە رۆژووە كەمێك قورسە لەبەرئەوەی لایەنگری زۆری نییە لەسەر ئاستی جیهان.
ژەمەكانی رۆژووی پچڕپچڕ
رۆژووی پچڕپچڕ پشت بە دەستنیشان كردنی جۆری خواردن نابەستێ، یان چەند ژەم بخورێت لە رۆژێكدا، بەڵكو تەنیا پشت بە رێكخستنی كاتەكانی خواردن دەبەستێ، بۆ نموونە لە جۆری یەكەمدا چی بخۆیت و چی نەخۆیت دەستنیشان نەكراوە، بەڵكو پێویستە خواردنەكانت تەندروستی بن وەك: میوە، سەوزە، دانەوێڵە، سەرچاوەی پرۆتینی بێ چەوری واتە گۆشتی پەلەوەر و ماسی، باشترین رۆنیش رۆنی ماسی، رۆنی زەیتون و گوێزو بادام و ئەڤۆكادۆ و هەروەها چەرەسەكان، هەڵبەت خواردنەوەش رۆڵی گرنگ دەبینێت، لەبەرئەوە دەبێ بەردەوام ئاو بخۆیتەوە، لەگەڵ ئەو خواردنەوانەی كە كالۆرییان تێدا نییە وەك چا و قاوە.
كاریگەرییە نەخوازراوەكان
بەهۆی رۆژووی پچڕ پچڕەوە مرۆڤ لە سەرەتاوە تووشی ماندووبوون و لاوازیی دەبێت.
بەهۆی هەستكردن بە برسێتییەكی زۆر، مرۆڤ زۆر دەخوات، یان خواردنی نا تەندروست دەخوات و بەهۆی خواردنی زۆرەوە، مرۆڤ تووشی دڵەكزێ دەبێت.
رەنگە ئەم رۆژووی پچڕ پچڕە كەمتر سوودی بۆ ژنان هەبێت و هەندێك لە توێژینەوەكان وا دەڵێن، بە تایبەتیش بۆ ژنی دووگیان باش نییە، هەروەها لەوانەیە ئەم جۆرە رێجیمە بۆ ئەو كەسانە باش نەبێت كە خەمۆكییان هەیە.

سەرچاوە: ئاژانسەكان