ئەمڕۆ لە بارەگای مەکتەبی سیاسی یەکێتیی نیشتمانیی کوردستان لە سلێمانی، هەڤاڵان دکتۆر خەسرەو گوڵ محەمەد و رزگار عەلی و ئاسۆ مامەند کارگێرانی مەکتەبی سیاسی و ئەمین بابەشێخ ئەندامی مەکتەبی سیاسی و ئەحمەد عەسکەری و سەرکەوت غەفور ئەندامانی سەرکردایەتی پێشوازییان کرد لە وەفدێکی حزبی تەکەتولی دیموکراتی لە پێناوی کار و ئازادییەکانی تونس، کە پێکهاتبوون لە دکتۆر خەلیل ئەلزاویە سەرۆکی حزب و هالە بن یوسف جێگری سەرۆک و کەمال کروکوری سکرتێری حزب و ئەسما بن ساڵح و سامیە ملکی فیسی.
سەرەتا هەڤاڵ دکتۆر خەسرەو بە گەرمی بەخێرهاتنی وەفدی میوانی کرد بۆ سلێمانی و وتی هاتنەکەتان هاوکاتە لە گەڵ ساڵیادی دامەزراندنی یەکێتیی نیشتمانیی کوردستان و بەستنی دیداری یەکێتی کە نموونەیەکی تازەگەریی و داهێنانی کاری حزبی یەکێتییە بۆ جۆشدانەوە و خۆرێکخستنەوەی زیاتر، هەروەها سەردانى وەفدەکەی بە گرنگ و پڕ بایەخ وەسف کرد کە نموونەیەکە لە دۆستایەتی و پەیوەندییەکانی یەکێتی لەگەڵ پارتە پێشکەوتنخوازەکانی جیهانی عەرەب کە خۆی لە پتەوکردنی برایەتی کورد و عەرەبدا دەبینێتەوە پاشان دکتۆر خەلیل ئەلزاویە سەرۆکی حزبی تەکەتول وێڕای دەربڕینی خۆشحاڵی خۆیان بۆ ئەو پێشوازییە گەرمەی لێیان کرا وتی " ئەم دۆستایەتییەى ئێمە ئەگەڕێتەوە بۆ بەشدارییە چالاکەکانی یەکێتی لە کۆنگرە و کۆبوونەوەکانی جیهانی عەرەب لە سۆسیالیست ئینتەرناسیوناڵ"
لەبەشێکی تری وتەکانیدا سەرۆکی حزبی تەکەتولی دیموکراتی تونسی کورتەیەکی لە بارودۆخی سیاسی و ئابووری تونس خستەڕوو کە لە زۆر قۆناغدا بە بارودۆخی عیراقی چواند و وتی "بەڵام لەوێ دەستوورێک هەیە کە دەوڵەتێکی مەدەنی لەسەر دامەزراوە و زۆرینەى لایەنە پێشکەوتنخوازەکانی تونس بۆ لێکتێگەیشتن لە چارەسەرى کێشە و قەیرانەکان لەسەری کۆکن" .
پاشان هەڤاڵانی وەفدی یەکێتی و وەفدی میوان سەبارەت بە گرنگی بەردەوامی ئەم جۆرە پەیوەندییانە لەگەڵ یەکتردا و لەپێناوی کاری هاوبەش و بەردەوامدا چەندین بیرو ڕایان ئالوگۆرکرد.
