محەمەد مەردان، داربەڕوویەک بە رەنگی سلێمانی

10:34 - 2024-02-01
کەلتور
360 جار خوێندراوەتەوە
#محەمەد مەردان

سەرکەوت عەلی حەبیب



کۆمەڵەی کەلەپوور و فۆلکلۆری کورد، ئەو کۆمەڵەیەی لەسەر دەستی رێبوارانی رێگەی عیشق و ئازادی دامەزرا، ئەو رێبوارانەی خەمی کوردیان لەبەربوو، بۆ کورد ژیان و دەژین.
کۆمەڵەیەک، کە کاکە حەمە مەردان و کاکە حەمەکانی تری شاری سلێمانی، کە باری نیشتمان، لە کۆڵی شانیان قورستر بوو، لە رۆژگارێکدا کە  برا لای لە برا نەدەکردەوە، ئەوان لایان لە خوشک و برایانی خۆیان دەکردەوە و تا نها کە 32 ساڵە خەمی گەورەیان هەر خەمی کورد و خەمی نیشتمانە.
دروود بۆ گیانی ئەو ئەندامانەی بەجێیان هێشتین.
تەمەندرێژی بۆ ئەوانەی لە ژیاندان.

دوورکەوتنەوە لە مردوو پەرستی، بەرەو زیندوو دۆستی

ئەم چەند دێڕە، نە پێداهەڵدانە، نە ئێمەش زیندووکوژی مردوو پەرستین، جێگەی خۆیەتی ئەمڕۆ دەستی رێز لە داربەڕوویەک، لە دڵسۆزێکی نیشتمان بنێین و تا لە ژیاندایە گوڵێک لە یەخەی بدەین و هەوڵ و کار و چالاکییەکانی بەرز بنرخێنین و ئەگەر بە چەند دێڕیکیش بەسەری بکەینەوە و دەستی ماندوونەبوونی بگوشین، هەر دیاریی شوان ئاسایە، لە ئاست دڵسۆزی و گەورەیی ئەو خەمخۆرە، خۆبەخشە.
کاکە حەمەی مەردان، تۆ کە وەک داربەڕوویەک چەقیوویت بە رەنگی سلێمانی، خەمخۆری دوو سلێمانییت، (سلێمانیی شار) و (سلێمانیی جگەرگۆشەت)(1) ئەو (دوو سلێمانی)یەی دوانەی لێکدانەبڕاون، چەشنی لاوک و حەیران، بە گەرووی مێژوودا شۆڕبوونەتەوە، ئێوە، لە خۆشەویستیی ئەو شارەی کە کامەران موکری ناوی نا: شاری هەڵمەت و قوربانی، ئەو شارەی شێخ رەزا وتەنی: مەربووتە حەیاتم بە سلێمانی و خاکی، جگەرگۆشەیەکت ناو دەنێیت: سلێمانی. ئەمە چ ژانێکە، ئەمە چ خۆشەویستییەکە بۆ شارێک، کە لیمۆی ترشی قسەی خۆشە و لە دوورەوە ئاو دەزێنێتە ناو دەمی هەرچی شاری کوردستانە؟!

دوو سلێمانی لە یەک دڵدا و کوردستان 
لە هەست و نەستدا
ئێوە لە خۆڕا جگەرگۆشەکەتان ناونانێن سلێمانی، ئەگەر سلێمانی، پیرەمێرد وتەنی: 
بەهەشتی پەنهان (سلێمانی)یە
ئەو دوو کانی، ئەم (هەزار کانی)یە، نەبێت، 
ئەو (سلێمانی)یەی چاو و دڵە، 
لە خوێندایە، لە جێی چوارپارچەکەی دڵە.
کاکە حەمەی مەردان، داربەڕوویەکی شارەکەمە، کە هەمیشە لە مەیدانی ژیاندا ئامادەی جەنگە و لێوانلێوە لە خزمەت، خزمەتێک چەشنی پیرەمێردی نەمر، بێ هیوا نییە و هەمیشە بە چاوی هیواوە دەڕوانێت، تا مژدەی بەیان بۆ گەلانی دوور و نزیک بنێرێت و گیانی خەمخۆرانی نیشتمان، ئەو خەمخۆرانەی ژیانی خۆیان بەخشی بۆ رۆشنکردنەوەی رێگەی تاریک و باریک، ئەو شاگردانەی گیانی (خاڵی شار، -حاجی تۆفیق- پیرەمێرد)یان لە گۆڕدا بە کردنەوەی ئاگرەکەی دامێنی گردەکەی یارە شاد دەکرد.
کاکە حەمە، شوێنکەوتووی کاروانە، هەم خانەخوێ، هەم میوانە و خەمی خەڵکی لەبەرە و باری نیشتمان لە کۆڵی شانی قورسترە و چەشنی پەپوولە، دڵداری چرا رۆشنەکەی نیشتمانە.
کاکە حەمەی برام، هەمیشە بە هیواوە دەژی، هەرگیز بێ هیوا نابێت و وێردی سەر زمانیشی: 
شەوێک پیاوێک لە بەفرا، ما، نەمرد، ئاگرێکی دووری دی، لە لای من نائومێدی کفرە، ئەی ئەم ئاگرەی دڵم بۆ کێ؟
بۆیە هەمیشە بە هیواوە، لە خەمی شار و خەمی بۆنە و یادەکانی کورددا بووە و دەبێت.

ساڵیادی رێکخراوێک کە 32 ساڵی تەمەنی پێ بەخشیووە

کاکە حەمە، گۆیژە ئاسا، بەپێوە وەستاوە، ئاسمان ملی دانەواندووە، ئەم دانانەوێ، بۆیە ماندووە! خودا پشتیوانی خەمخۆرانی نیشتمان بێت و (کاکە حەمە)ش ماندوو نەبێت، چونکە یەکبینە لە خەمی ئاگرەکەی یارە و یاد و بۆنەکانی کوردە و بۆ خۆشەویستی ئەم نیشتمانە، خۆبەخشانە و بە چەشنی ئەرکی سەرشانی، ئەستێرە دەخاتە خەو، خۆیشی ناخەوێت.
ئەمڕۆ، کە ساڵیادی رێکخراوێکە (2) کە یەکبینە لە خەمی کوردی ماڵ لە کۆڵە و خەمخۆرێکە هەمیشە بە خەمەوە بۆ خەمەکانی نیشتمان دەڕوانێت، بۆیە جێگە خۆیەتی تا ئەو زاتانە لە ژیاندان، گوڵێک لە یەخەیان بدرێت و بە چاوی رێزەوە لە هەوڵ و کار و چالاکییەکانیان بڕوانین، کە سەرقافڵەچی ئەو کاروانەش کاکە (حەمەی مەردان)ە.
بۆیە ئەم چەند دێڕە کاڵا بە قەد باڵایە و ئاویش لە حەق دەوەستێت.
تا، پیرەمەگروون چیای سەرکەش بێ
تا، ئاگری یارە،  مژدەی نەورۆز بێ
(حەمە مەردان)یش، پایەیە و سایە
وەک سلێمانی لە خوێنماندایە.
بە هیوای تەمەندرێژی و خزمەتی زیاتر.
(1): کاکە حەمەی مەردان، لە خۆشەویستی سلێمانی، جگەرگۆشەیەکی ناو ناوە سلێمانی.
(2): کۆمەڵەی کەلەپوور و فۆلکلۆری کورد- سلێمانی.

کۆمەڵەی کەلەپووری کوردی زیندووکەرەوەی نەریتێکی پێرەمێرد بۆ جەژنی نەورۆز


بابەتە پەیوەندیدارەکان