روانینێکی دوور لە ئیشراق

11:52 - 2024-03-12
دووتوێ
107 جار خوێندراوەتەوە

رۆژ هەڵەبجەیی

بەو هەموو ڕوانینەوە،
کە سەیری دنیا دەکات،
بێ ئاگا لەوەی دنیا هیچە،
لە هیچەوە دێتەوە...
هەر خۆی نەکەوتۆتە لافاوی هزرەوە،
دەست و پەنجەکانی دێنە گۆ،
قەترەیەک لە  دنیا یادگارییە،
 کە دەچێت ئیتر نایەتەوە...
لە دووری ئەم ڕوانینەوە ،
مەحەبەتم درزی بردووە،
درەنگە بگەمەوە ئەوسەری ئیشراقی،
گوڵ کە سیس بوو،
زبڵخانە چاو دەکاتەوە..
مەحەبەت چ دەردێکە،
 بەم هەموو ئیمانەوە،
سەرم پڕ دەکا لە نووچ !
خول دەخۆم و هەر ناگەمەوە،
 بە خودی خۆم..
 کە پیاچوونەوەیەک بە لاپەڕەکانی بەرائەتا هەڵدەچنم
بینینم   بە تەمێک  قورس بووە ،
کەچی لەنزیک ڕۆحی پرتەقاڵیمەوە،
بە سیمایەکی دوور دەڵێم: ئاگات لە مەحەبەت بێت،
لە دەست و پەنجەکانت بەرنەبێتەوە،
ئەم ئیشراقە ئێشی زۆرە،
کە شکا و هاڕەی کرد ،ئیتر نایەتەوە !
*             *             *
هەمیشە ڕێگایەک وندەکەین و 
یەکێکی تر دەدۆزینەوە..
ئەو ڕێگایانەی ونمان کرد، 
ڕاستە تەریب بوون بە یەکتر..
لێ لەکۆتایی ئەو ونبوونەدا 
هەر ڕێگایەک دێتە گۆ ،
دەست هەڵدەبڕێ،
 نێچیری پێڵاو بێ..
ئەم ڕۆشتنە دەمباتەوە لای 
کەسێکی شەرابی،
کە تەریبە بە ڕۆحم و نزیکە لە مەوجدانی دڵم !
وامزانی لەتێک لە سێبەرمە،
لە حوزنما هاوسەفەرمە..
کاری سەرابە چاوەکانمان تینوو دەکا،
گەمژەییە هەر بە دوای ئاوا وێڵین،
ئاو کە چووە ناو کەشتی،
گومان چ کارەیە؟
یەقین ڕێگەیەکە بژاردەی مردن..
من ئەم عیشقە ،کە دەدۆزمەوە،
سەرم بە ئەڵقەی ئەلفێکەوە نابەستم،
مەودایەک هەیە قفڵ ڕێژ،
لێ شێتانە  بۆی دەگەڕێم..
من گەڕانم چەشنی ئاوە، 
ئەو نغرۆ بوون بە  تراویلکە !
چ ئەفسانەیەکە شیعر هەر بە باڵی غەزەلدا بفڕێ،
چاوی ئاسمانێکی نەبێ لە نوقتەوە،
بگاتە دەنگی دێڕ..
ئەڤین چ خەراباتێکە،ئاشق دوورە،
 لە پێناسی مەعشوق و 
بگاتە کەشفی فیراق ..
لامی ئەم لاولاوە چەند ئاڵۆزە ،
پێچاو پێچە میزاجی ،
دەلاقەیەکی نییە بگاتە ،
سەرە داوێک لە ئیشراق !

       *           *           *
هەر شتێک لە تاریکیدا هەنگاوی نا،
لە ڕووناکیا بۆی مەگەڕێ..
پێی وتم/لە دڵدا بۆی بگەڕێ ،
بێ ئاگا دەستم بۆ دڵم برد،
لێ لە شکانی شعورا،
شوێنێکم دانا بۆ پەشیمانی..
مردن کە  بە تەریق بوونەوەدا دەڕوات،
 دڵ دەبێتە تای  تابووت !
خودایە من تەنها لە ڕوانینێکی دوورا
مەحەبەتم پڕکرد لە گەمەی مناڵی !
ئەو بە خودی ئیشراقەوە،
 بەریدایە کەفی دەریا..
پێم وتم: ئەی کاشیفەی فیراقم
چ گرنتییەکم پێ دەدەی،
تا نەگەمە جەنگی دڵ کوشتن،
لە چ خەمێکدا‌ هاوبەشمی،
تا دیواری ئەم ئاسمانە  هەڵچنم،
بە ڕەنگاڵەی فڕین !
لە چ ئەشکێکی مناڵانەمدا هاوڕێمی،
تا گریانی بووکە شوشەکان ،
بگۆڕم بۆ پێکەنینێکی ئەزەلی..
بە تەفسیری چ ئومێدێک ڕامدەژەنی،
تا لە قوڵایی  بەهانەیەکی مێخۆشدا
جیلوەی تەجەللایەک بچنم ،
لە تەونی تاریکی..
سەرم مەشێوێنە بە ،
 مەعریفەی ئەم پرسیارانە،
کە خۆم نازانم لە چ پرسیارێکدام ..
پرسیار داری مەعریفەیە، بەم سەرەگێژەمەوە
دارێک شک نابەم دارە، دارەی پێبکەم..
ئەزیزم بەم هەموو تێکشکانەی شیعرمەوە،
شێتییەک ئەزبەر دەکەم ،
تا ئەوپەڕی هەڵخلیسکان ،
نە مەیخانەم دیوەو نە پەنجەی ساقی بە پێکەوە
لێ پڕم لە خەرابات و ئەبجەدییەتی
ئەو حەرفانەی نەبیراون  لە گریانی شەرابەوە..
ئیلاهی زەڕەیەک ڕووناکی بخەرە دەفری کاڵفامیم...
کە من لە مەحەبەت بەتاڵ و 
لە هێشووی دڵمەوە ،
 ڕێنووسی کەندو لەند دەنووسمەوە..
خۆ وتم: هەر شتێک لە تاریکییا هەنگاوی نا،
لە ڕووناکییا بۆی مەگەڕێ !  
         *          *         *
      لە دووری ڕوانینێکەوە،
بڕوا بەچاو مەکە،
بینین هەر خەستی خەیاڵێکە..
من لە ناسینی تۆ نە پێکەنینی پێکم ،
 نە خولگەی عاتیفە..
کە بارانی جەفا هەڵیکرد، تۆ وتت: مەرحەبا..
خودایە دڵ چ تووشبوونێکە ،
ئەم هەموو دڵە چییە لە کۆپییەکی  شکستەدا،
شکست دەخوات؟؟
من خەیاڵدانم  خاکی بووە،
 کونجی پیربوون تاریکییە،
خۆڵ کەلتووری کوژانەوە!
مرۆڤ کە دەکوژێتەوە، لە پەراسوویەوە خۆڵ پێدەکەنێت،
پێستی تاریکی تەریقەتی ماڵی..
بیرت بێت ئەی مەرحەمەتی دڵم،
مەرگ لە یەخەی هەموواندا نووستووە
مەرگ ئەو کاتە کارەساتە، 
دڵ لە دوا ترپەدا عیشق لێ نادات..
تۆ کە مەلەوانی دەریای عیشقستانی،
لێ هێشتا  نامۆی بە شەمع و پەروانە..
ڕیزکردنی ئەم هەموو دڵە لە پای چی؟
بە باڵی فەلسەفەدا دەفڕیت،
 کەچی هێشتا لە کۆڵانی ئاسمانێکدا،
شەقژنت دانەگیرساوە !
ئەم هەموو قافییەی دڵە بۆچی!؟
ئیلاهی لە کاتژمێری سفرەوە دێمەوە،
 ئەم هەموو پاییزی عیرفانە،
چ ئۆقیانووسێکە شەپۆل دەدات،
لە نەسلی عەدەم !
گوڵەکانی ئینجانە کەی جوانن، 
لە باخچەدا ڕۆشتوون ،
بۆنیان هەر بۆ ماڵێکە ؟
ئەم بولبولانە بۆ نابینا بوون، لە کاتێکدا
چەهچەهەیان تابلۆی نەخشی ، 
سەر دیوارێکە؟
خودایە شوناسی ئەو ئیشراقە،
لە کوێ بێنم ماڵی گوڵ ئاشت بکاتەوە
بە باخچە..چاوی بولبول  ،
تیمار بکا بە چەهچەهە !
ڕۆحی منیش زاخاو بدا بە ،
 توحفەی میناکانی میتافۆر..
گۆزەیەک لە غەزەلی  شێتانەی،
لەسەر شانی کلاسیکەوە، 
تل بکەمەوە بۆ کەمەری مۆدێرنە،
 شەو هەڵپاچم ، ئەستێرە بگرمەوە !
خۆ وتم: لەدووریی ڕوانینێکەوە ،
بڕوا بە چاو مەکە 
هەر خەستی خەیاڵێکە،
خەیاڵدان خامۆش و لە یەخەی،
 فاتیحایەکدا کاڵبوونەوە!

بابەتە پەیوەندیدارەکان