وردە شەپۆلەکانی رۆح

‎ئاوات حەسەن ئەمین

( 1 )

ئاسوودەیی پەپوولەیەکی تەمەن کورتە
لەیەک وەرزا .هەموو جوانییەکانی خۆی نمایش دەکات .

خەمو خەفەت، دەمووچاوێکی ڕمووزنە
بیست وچوار سەعات، خۆیمان نیشان دەدات .!


( 2 )

بەیانی هات ..
 خۆر چاوی پشکووت

بەسەر باخ و بێستانەکاندا
ڕووناکی پەخشکرد .

لەوساتە هەستیارەدا
خۆشەویستەکەم لەخەو هەڵسا
دیدەکانی هەڵگڵۆفت و
دواباوێشکی ڕابوونی دا .

ئەوسا ئیتر ..
منیش کەوتمە سەر ڕاستە شەقامەکە و
بۆ ڕۆژێکی پڕ لەفرمان
شەپۆلم دا .

( 3 )

لەوانەیە ..
  ستایش کردنێک
جێگای تیکەنانێکت بۆ نەگرێ ،
وەلێ خۆنچەی هیوایەکت
تیادا دەپشکوێنێ ......

        
( 4 )

کاتێ باران دەبارێ
ڕۆحی ماندوو و شەکەتمان
دەشواتەوە بەجارێ .

پشوو دەدات بە ئەندێشە و خەیاڵمان
ئەی ژیێنێتەوە باخ و گوڵ و ماڵمان .


( 5 )

پێناسەکە ئاوەهایە :
دواجار .. گرێ کوێرەیەک هەیە
دەبێ بیکەینەوە
تا لە مانای ژیان
بگەین ..!

( 6 )

ڕێگا درێژەکانی چاوەڕوانی
تەمەنی بەدەست هێنانی
هیواکان کەم دەکاتەوە .

      ( 7 )

سەیرە کاتێ گەڵاکان دەوەرن ،
کۆڵانەکان پڕدەکەن لە یادگاری درەختەکان ..
سەربازەکان ، لەشەڕە دۆڕاوەکانیان دەگەڕێنەوە ..
بەپۆستاڵە قوڕاوییەکانیان
پێدەنێن بەو گەڵایانەدا
خۆیان لەوە گێل دەکەن
ئەوان .. یادگاریی عاشقەکانن .


( 8 )
ھەموومان پیردەبین ..
ھەموومان سوتووی ڕۆژگار 
لەتەمەنمان دەوەرێ .
ھەموومان بارانی خەفەت
تەڕمان دەکات .

وەلێ بەدڵنییایەوە
دەبێ ھەموومان بەھیواوە
ئامێز بۆ ئایندە بکەینەوە .
تانەوەکانمان
کاروانەکە بگەیەننە مەنزڵ ..
ئەوە ڕاستی ژیانە
ھەروابووە و ھەر وادەبێ .......


( 9 )
چاوەڕوانی چرۆ ناکا
گەر بەفرمێسک ئاونەدرێ

شیعری منیش گەشەناکا
گەر بەماچ پرژێن نەکرێ


( 10 )

وانەزانی.. تەنیا قەفەس ماڵی باڵندەیە ،
لەدەرەوەی ئەو قەفەسە.. فڕین ھەیە..!


( 11 )

کەس ناناسم..
چەند سەمەرەیە ؛
منێک وێردی گشت کۆڵانەکانی
شارم کردبێ .
سەروو خوار و
ڕاست و چەپی
دڵی گەڕەکەکانی زێدی خۆم کردبێ  ؛
سەمەرە نییە کەوا ئێستا کەس ناناسم
مەگەر بۆ دیوارە کۆنەکانی ..
بکەم باس و خواسم ..!


( 12 )

بەوردیی..
تێدەفکرم لەهەڵوێستیی
دوورە دەستی تەووری زەمان ،

بەورەوە ..
دەچمە بەردەم 
دادگای ویژدان ،

بەهیواوە دەڕوانمە
ئاسۆی ژیان ،

ئەوە منم مێژوو دەنووسمەوە ،
تۆش ئەی دەعبا ؛ بۆ زبڵدان ..!

* بەشێکە لە قەسیدەیەکی درێژ.