سیاسەتمەدارێكی عیراقی پێیوایە، سەردانەكەی محەمەد شیاع سودانی سەرۆك وەزیرانی عیراق بۆ واشنتۆن لەسەر بانگهێشتنامەی ویلایەتە یەكگرتووەكان بووە تا شەرعیەت ببەخشێتە حكومەتی بەغدا بۆ چاكسازی، ئەگەرچی هەنگاوەكانی چاكسازییش سانا و ئاسایی بن.
میسال ئالوسی سیاسەتمەدار و سەرۆكی حزبی ئومەی عیراقی، لە لێدوانێكی تایبەتدا بە كوردستانی نوێی راگەیاند: «سەردانی سەرۆك وەزیرانی عیراق بۆ ئەمریكا، لەسەر بانگهێشتنامەی رەسمیی ئەمریكا بووە، تا شەرعیەت بدرێتە حكومەتی فیدراڵ و هانبدرێت هەنگاوی چاكسازی هەڵبێنێت لەڕووی چارەسەركردنی كێشەكان لەگەڵ هەرێمی كوردستان، كێشەكان لە ئەنجومەنی نوێنەرانی عیراق بەتایبەتی ئەوەی پەیوەندی هەیە بە داڕشتنی یاسای نەوت و غاز و دەستپێكردنەوەی هەناردەی نەوتی هەرێم».
بە وتەی میسال ئالوسی «سەردانەكەی سەرۆك وەزیرانی عیراق، تاقیكردنەوەیەكە بۆ حكومەتی فیدراڵ، تا متمانەی ئەمریكا و جیهان بەدەستبهێنێتەوە» و وتی: هیوادارین سەردانەكە ببێتە مایەی زیاتر چەسپاندنی پەیوەندییەكانی عیراق و ئەمریكا.
