تیشکۆ
بۆ دیارییكردنی دوا هەڵبژاردەكانی بەشدار لە ئۆڵۆمپیادی پاریسدا، ئێستا لە قەتەر یاریەیكانی خولی تۆپی پێی هەڵبژاردەكانی ئاسیا بۆ ئەو یاریزانانەی تەمەنیان لە 23 ساڵ كەمتر بەردەوامە.
یارییەكانی رۆژی 15/4 دەستیپێكردووەو تا 3/5/2024 بەردەوام دەبن، لەم خولەوە سێ لە هەڵبژاردەكانی ئاسیا دەگەن ئۆڵۆمپیاد، بەوەش سیانزەیەم تا پانزیەمین هەڵبژاردە دەردەكەون، چوارەمی ئەم خولەش یاریی پاشكۆ پاڵاوتن لەگەڵ نوێنەری كیشوەری ئەفریقیا (غینیا) دەكات و براوەی ئەم یارییەش كە رۆژی 9/5/2024 لە فەرەنسا دەكرێت،دەبێتە 16 یەمین و دوا هەڵبژاردەی بەشداری ئەم ئۆڵۆمپیادە.
ئێستا ئەم خولە پێی ناوەتە قۆناغی 8 هەڵبژاردەوە، چوار یارییەكەی ئەم قۆناغەش ئەمڕۆ پێنجشەممە و سبەی هەینی 25 و 26/4 بەمشێوەیە دەكرێن:
پێنجشەممە 25/4/2024
*قەتەر × ژاپۆن - سەعات 5 ی عەسر.
*كۆریای باشوور × ئەندەنوسیا - سەعات 8:30 شەو.
هەینی 26/4/2024
*ئۆزبەكستان × سعودیە - سەعات 5 ی عەسر.
*عیراق × ڤێتنام - سەعات 8:30 شەو.
براوەكانی ئەم چوار یارییە دەگەنە قۆناغی دواتر و چوارگۆشەی زێڕین،دوویارییەكەی ئەم قۆناغەش رۆژی دووشەممە 29/4 دەكرێن، ئەو دوو هەڵبژاردەیەی رۆژی هەینی 3/5/2024 یاریی كۆتایی دەكەن راستەوخۆ دەگەنە ئۆڵۆمپیادی پاریس، لە یاریی دیارییكردنی سێیەم چوارەمیشدا كە پێنجشەممە 2/5/2024 دەكرێت، براوەی یارییەكە دەبێتە سێیەمی ئەم خولەو دەبێتە سێیەم هەڵبژاردەی ئاسیاش كە دەگاتە پاریس، دۆڕاویش یاریی پاشكۆ پاڵاوتن لەگەڵ غینای نوێنەری ئەفریقا دەكات و براوەی ئەم یارییەش دەبێتە دوا هەڵبژاردەی سەركەوتوو بۆ ئۆڵۆمپیادی پاریس.
