شه‌هید به‌كر محه‌مه‌د فه‌ره‌ج حه‌سه‌ن ناسراو به هه‌ڵمه‌ت، له دایكبووی ساڵی 1968ی گوندی شه‌ده‌ڵه‌ی ناحیه‌ی سورداشه، ساڵی 1983 په‌یوه‌ندی كردووه به رێكخستنه‌كانی یه‌كێتیی نیشتمانیی كوردستانه‌وه، ئه‌ندامێكی چالاك و چاونه‌ترسی رێكخستن بووه.
هه‌ر له ساڵی 1983دا بۆته پێشمه‌رگه له كه‌رتی دووی تیپی پارێزگاریی مه‌ڵبه‌ندی دووی ئه‌وسا.
به‌شداریی چه‌ندین نه‌به‌ردیی قاره‌مانانه‌ی كردووه، له‌وانه: داستانه‌كانی دابان- هه‌لاج و قه‌یوان- ماوه‌ت و زۆری دیكه، پێشمه‌رگه‌یه‌كی ئازا و به ده‌ستوبردی شه‌ڕه‌كان بووه، گوێڕایه‌ڵ و به دیسپلین بووه، هه‌روه‌ها خۆشه‌ویستی ناو هاوڕێكانی و ده‌وروبه‌ریشی بووه.
ئه‌وكاته‌ی رژێمی به‌عس كه‌وته هێرش بۆ سه‌رناوچه رزگاركراوه‌كان و به‌رده‌وام هێرشی زه‌مینی و تۆپبارانی گونده‌كانی ده‌كرد، له‌و كاتانه‌دا كه هێرشه‌كانی دوژمن بۆ سه‌ر دۆڵی جافایه‌تی و ناوچه‌ی سه‌ركردایه‌تی شۆڕش چڕ ببۆوه و فشارێكی زۆری دروستكردبوو، وه‌ك به‌رپه‌رچدانه‌وه‌ی ئه‌و هێرش و په‌لامارانه و بۆ كه‌مكردنه‌وه‌ی فشاری سه‌ر باره‌گاكانی سه‌ركردایه‌تی، هێزی پێشمه‌رگه له ساڵی 1987دا له چه‌ند ناوچه‌یه‌ك هێرشی پێچه‌وانه‌ی ده‌ستپێكرد و دوژمنی تێكشكاند، له‌وانه: هێرشكردنه سه‌ر زنجیره ره‌بایه‌كانی سنووری سورداش و شاخی پیره‌مه‌گروون، شه‌هید هه‌ڵمه‌ت له‌و هێزه‌ی پێشمه‌رگه‌یدا بوو كه زنجیره ره‌بایه‌كانی شاخی سپیلك و قوڵه سه‌وز و قوڵه‌پوشینه‌یان پاككرده‌وه له‌و سنووره، ئازایانه مۆڵگه‌كانی دوژمنیان ده‌ستبه‌سه‌رداگرت.
به‌ڵام به‌داخه‌وه، له رۆژی دوای رزگاركردنی ئه‌و زنجیره شاخانه و به‌دیاریكراویش له شاخی سپیلك، به‌هۆی مینه چێنراوه‌كانی دوژمنه‌وه له ناوچه‌كه، رۆژی 14/4/1987 هه‌ڵمه‌ت شه‌هید بوو و گیانی خۆی كرده قوربانی گه‌له‌كه‌ی.
