مەسرور بارزانی سكاڵایەكی تۆماركرد، تێیدا داوا لە دادگای فیدراڵی دەكات، دادگا بڕیارێكی وەلائی دەربكات بۆ راگرتنی رێكارەكانی هەڵبژاردنی خولی شەشەمی هەڵبژاردنی پەرلەمانی كوردستان.
مەسرور بارزانی لە سكاڵاكەیدا، دەڵێت: كۆمسیۆن هەرێمی كردووەتە چوار بازنە و كۆتاكانی بێبەش كردووە، هەروەها ئەوەش دەخاتەڕوو كە كۆمسیۆن پێچەوانەی ماددەی 49 پشتی بە ژمارەی دەنگدەران بەستووە لە دیاریكردنی ژمارەی كورسیی بازنەكان.
لێرەدا پرسیارێك لە كاك مەسرور و راوێژكارەكانی دەكەم:
یەكەم: كۆمسیۆن لەسەر بنەمای كورسیی بازنەكانی هەڵبژاردنی ئەنجومەنی نوێنەران، كورسیی بازنەكانی هەرێمی كوردستانی دیاریكردووە، ئەوانیش لەسەر بنەمای ژمارەی دانیشتوان كورسییەكانیان دیاریكردووە.
دووەم: كۆمسیۆن لەسەر بنەمای بڕیاری دادگای فیدراڵی، هەرێمی كوردستانی كردووەتە چوار بازنە.
سێیەم: كۆمسیۆن لەسەر بنەمای بڕیاری دادگا، كورسی بۆ كۆتاكان دانەناوە.
چوارەم: نازانم بە چ مافێك پێگەی سەرۆك وەزیران بەكاردەهێنێت، بەڕێزیان كاربەڕێكەر و ماوەبەسەرچوون، ئایا رەزامەندیی ئەنجومەنی وەزیرانی وەرگرتووە، چونكە تەواوی حزبەكان لەگەڵ بڕیاری دادگای فیدراڵین. كارەساتەكە لێرەدایە پێگە رەسمییەكان بۆ كاری نایاسایی و بەرژەوەندیی حزبی، بەكاردەهێنن.
چاودێرێكی بەئاگا
