قوباد تاڵەبانی پێشوازی لە باڵیۆزی ئیسپانیا لە عیراق کرد

پیدرۆ مارتینیس باڵیۆزی ئیسپانیا لە عیراق بە بۆنەی کۆتاییهاتنی ئەرکەکەی، سەردانی قوباد تاڵەبانی جێگری سەرۆکی ئەنجومەنی وەزیرانی هەرێمی کوردستانی کرد.
هەر لەو چوارچێوەیەدا، قوباد تاڵەبانی رایگەیاند: پیدرۆ مارتینیس کاتێک لەساڵی 1987 وەک دیپلۆماتێک لە باڵیۆزخانەی ئیسپانیا لە عیراق دەستبەکار بوو، ئاگاداری پرسی کورد و ئەو ستەم و نەهامەتییانەش دەبێت کە رووبەڕووی کورد بووەتەوە، لەو کاتەوە تاکو ئێستا دۆست و هاوسۆزی گەلی کوردە.
هەروەها وتیشی: لەم ساڵانەی دواییشدا کاتێک پیدرۆ مارتینیس وەک باڵیۆزی ئیسپانیا لە عیراق کاری دەکرد، بەردەوام هەوڵی نزیککردنەوەی بۆچوونی لایەنە سیاسییەکانی دەدا و زۆریش بە پەرۆش بوو بۆ بەهێزکردنی پەیوەندیی نێوان هەرێم و وڵاتی ئیسپانیا لە بوارە جیاوازەکاندا.
هاوکات قوباد تاڵەبانی ئاماژەی بەوەشکرد ئەمڕۆ 8/5/2024 بەبۆنەی کۆتاییهاتنی ئەرکەکەی لە عیراق، بۆ ماڵئاوایی سەردانی کردین، سوپاسی هەموو هەوڵەکان و هاوکارییەکانیم کرد لە ماوەی کارکردنیدا و هیوای سەرکەوتنم بۆ خواست لە ئەرکی داهاتوویدا.