ئاوات کۆکەیی
ئەمڕۆ یادی 23 ساڵەی كۆچی دوایی پێشمەرگە و
تێكۆشەری ناسراو، رۆژنامەنووس و دیبلۆماتكار و یاساناس شازاد صائب-ی نەمرە، كە لە
21/5/2001 بە رووداوی ئۆتۆمبێل كۆچی دواییكرد.
كاك شازادی نەمر، یەكێكە لەو تێكۆشەرە دیارانەی
یەكێتیی نیشتمانیی كوردستان كە هەموان و بە تایبەتیش رەوانشاد مام جەلال، بەگرنگییەكی
زۆرەوە لێیان روانیوە و هەر هەڤاڵ مام جەلال-یش دەربارەی ئەو تێكۆشەرە وتوویەتی: ئەگەر
كاكە شاقبوڵی كردبا دەمێك بوو دەچووە سەركردایەتییەوە و هیچ رێگرییەكیشی لێنەدەكرا.
كەواتە لێرەدا ئەوەمان بۆدەردەكەوێت هەركاتێك
ئەو رازی ببوایا ئەوا پلە و پۆستی باڵای پێدەرا، بەڵام كاروخەباتی ئەو بۆهیچ پلە و
پۆستێك نەبووە و بگرە جگە لە خۆی و تەمەنی گەنجێتی كە بەكوردستانی بەخشی، هەرئەوك اتەش
كە تێكەڵی دنیای سیاسەت و تێكۆشان بوو خاوەنی سەروەت و خۆشگوزەرانییەكی باش بوو، كەسێكی
یاسایی و خاوەن بڕوانامەی بەرزیش بوو، كەچی وازی لە هەموو ئەوانە هێنا و بەشداریكرد
لە خەباتی گەلەكەیدا دژی داگیركاری و ستەمكاری، هەرئەو سەروەتەشی كە هەیانبوو خستییە
خزمەتی رێكخستنەكان و هاوكاریی زۆری مادی شۆڕشی كردووە.
بەدرێژایی ماوەی خەباتی شازاد صائب لە بوارەكانی:
رێكخستنە نهێنییەكان و پێشمەرگایەتی و یاسایی و دیپلۆماتی و ئیداریدا لە قۆناغەكانی
سەرەتای شۆڕش و بەهێزبوونی شۆڕش و دوای راپەڕینیش؛ دڵسۆزییەكی زۆری نواندووە و دەستكەوتی
باشیشی بۆ كورد و یەكێتیی نیشتمانیی كوردستان هەبووە، بەبێ رەچاوكردنی بەرژەوەندییە
كەسیەكانی خۆی تێكۆشانی بەڕێوەبردووە، هەر بۆیەش بە (كاكەشا) ناوی دەركرد و هەڤاڵێكی
هەرە خۆشەویست و رۆح سوكی هەڤاڵان و تێكۆشەران بوو.
شازاد جەمیل صائب، لە دایكبووی ساڵی 1946 بنەماڵەیەكی
دیار و رۆشنبیر و تێكۆشەری شاری سلێمانییە، دەرچووی كۆلێژی یاسای زانكۆی بەغدایە.
لە قۆناغی ناوەندیدا بەشداری لە خەباتی گەلەكەیدا
كردووە و بووە بە ئەندامی یەكێتی قوتابیانی كوردستان و پارتی دیموكراتی كوردستان.
لە جوڵانەوەكانی خوێندكاراندا بەتایبەت لە بەغدا
رۆڵی دیاری بینیوە، ئەندامی مەكتەبی سكرتاریەتی یەكێتی قوتابیانی كوردستان و یەكێك
لە سەركردەكانی مانگرتن و خۆپیشاندانی خوێندكارانی زانكۆی بەغدا بوو لە ساڵی 1967 دا.
دوای تەواوكردنی خوێندن، بووە بە پارێزەر و
لەسەر مافی هەژاران زۆر داكۆكیكردووە، هاوكات لە كار و تێكۆشانی سیاسیش بەردەوام
بووە.
ساڵانی 1969-1970 سەرنووسەری گۆڤاری رزگاری
بووە كە ئەو گۆڤارە زەمینەخۆشكەری ئایدیۆلۆژیا و دامەزراندنی كۆمەڵەی رەنجدەرانی
كوردستان بوو، دواتریش كاك شازاد بوو بە یەكێك لە دامەزرێنەرانی كۆمەڵەیە.
دوای شكستی ساڵی 1975، شازاد صائب پەیامی كۆمەڵە
و تێكۆشەرانی ناوەوەی كوردستانی گەیاندە هەڤاڵ مام جەلال لە دەرەوەی وڵات و ساڵی
1979ش لەسەر داوای سەركردایەتی یەكێتیی نیشتمانیی كوردستان و شۆڕشی نوێ دەستی لە كار
و پیشەی تایبەتی خۆی هەڵگرت لە عیراق چۆتە دەرەوە و ماوەیەك لە بەریتانیا نیشتەجێبووە،
دواتر ئەركی نوێنەرایەتی یەكێتیی لە سوریا پێسپێردراوە.
ساڵی 1980 وەك پێشمەرگەیەك گەڕاوەتەوە
كوردستان و بەهۆی ئەوەش كە شارەزایی زۆری لە یاسادا هەبووە، دادگاكانی شۆڕشی نوێی
دامەزراندووە و یەكەمین یاسا كە سەركردایەتی ی.ن.ك پەسەندیكرد بۆ كارپێكردنی، كاك
شازاد صائب نووسیبووی.
پاش ماوەیەك لە ژیانی پێشمەرگایەتی، دووچاری
نەخۆشییەكی سەخت دەبێت و بەناچاری دەچێتە وڵاتی هۆڵەندا، بەڵام لەوێش وەك كادرێكی
سیاسی، دیپلۆماسی، رێكخراوەیی كاریكردووە و لە زۆربەی گەشتەكانی هەڤاڵ مام جەلال یەكێك
بووە لە یاوەرەكانی.
لە كۆبوونەوە و كۆنفرانسەكانی كۆمەڵەی رەنجدەرانی
كوردستان بەشداریكردووە و لە یەكەم كۆنگرەی ی.ن.ك سەرۆكی دەستەی بەڕێوەبەری كۆنگرەكە
بووە.
لە دووەم كۆنگرەش یەكێك لە ئەندامە دیارەكان
بووە، پێشتریش ئەگەر خۆی رەزامەندی لە سەربدایا هەر لە سەرەتاوە دەبووە ئەندامی سەركردایەتی
كۆمەڵە و یەكێتی.
لە زۆربەی بوارەكاندا جێدەستی دیاربووە و خەرمانی
خەباتی پڕ پیت و بەرەكەت بووە، لە سوریا و لوبنان پەیوەندییەكانی ی.ن.ك و جیهانی عەرەبیی
بەڕێوەبردووە.
ساڵی 1988 یش بووە بە نوێنەری یەكێتی لە ئەوروپا،
ساڵی 1994-2001 نوێنەری یەكێتی بوو، لە ئەنكەرەی پایتەختی توركیا.
رۆژی 24/1/2001 پۆستی وەزارەتی كشتوكاڵی
حكومەتی هەرێمی كوردستان پێسپێردرا و رۆژی 21/5/2001 لەسەر رێگەی گشتی پیرەمەگرون-
تاسڵوجە بەرووداوی ئۆتۆمبێل گیانی لەدەست دا.
