ناسر وەحیدی، چیرۆكنووس و وەرگێڕ

ئامادەكردنی/ مستەفا فاتیح 

لە ئەدەبی گێڕانەوەیی و چیرۆكنووسی كوردیدا، ناسر وەحیدی دەنگێكی ناسراوە كە دەتوانین بە بەرەی دووی چیرۆكنووسانی رۆژهەڵاتی كوردستانی ناو ببەین. لەبەرەی یەكەمی چیرۆكنووسی رۆژهەڵاتی كوردستاندا، رەحیم قازی،  حەسەن قزڵجی، سەلاحودین موهتەدی، مەلاكەریمی ساردە كوێستانی بە پێشەنگەكانی ئەدەبی گێڕانەوەیی و چیرۆكنووسی كوردی دادەنرێن. 
لە بەرەی دووهەمی چیرۆكنووسان و نووسەرانی ئەدەبی گێڕانەوەیی كوردی كەسانی وەك «فەتاح ئەمیری» ، «عەتا نەهایی» ، « حوسێن شێربەیگی» و «عەتا بەرفی» و «ناسر وەحیدی» و كۆمەڵێك دەنگیتر دەبینرێن. 
ناسر وەحیدی لە  14ی شوباتی 1958 لە بنەماڵەیەكی ئایینی لە شاری بۆكان لە دایكبووە. كوڕی مەلا رەحمانی موئەزین، كوڕی حاجی مەلاساڵحی سەدراباتە. ناسر تەنیا كوڕی ماڵ و حەوت خوشكی بووە. خوێندنی سەرەتایی و ناوەندی لە شاری بۆكان خوێندووە و دواناوەندی چۆتە پەیمانگەی مامۆستایان لە مەهاباد.  لەو ساڵانەدا دۆستایەتییەكی پتەو لەگەڵ مامۆستا هێمن موكریانی ساز دەكات. كەسایەتی و بیر و هەزری مامۆستا هێمن كاردانەوەیەكی زۆری لەسەر دادەنێت. دوای دوو ساڵ پاش تەواوكردنی خوێندن دەگەڕێتەوە بۆكان، بۆ ئەوەی لەسەر ئاواتی لەمێژنەی ببێتە مامۆستا و بەشێوەی سەمەدی بیهڕەنگی قوتابی ژیر و وریا بۆ خزمەت بە نیشتمانەكەی پەروەردە بكات. بەڵام دوای سەركەوتنی شۆڕشی گەلانی ئێران، رێی لێدەگرن و نا‌هێڵن ببێتە مامۆستا و لە بەڕێوەبەرایەتی خوێندن و بارهێنان دەردەكرێت. ناسر بەشێوەیەكی چالاك لەگەڵ نووسەران وشاعیرانی بۆكانی هەوڵی دامەزراندنی بنكەیەكی ئەدەبی بەشێوەی یاسایی دەدات، تاكوو زۆربەی لاینگرانی ئەدەب و هونەر لەدەوری یەكتر كۆبكەنەوە. پێش دامەزراندنی ئەنجومەنی ئەدەبی حەوتووی شەوێك لە ماڵی ئەدیبێك لە قەوارە دە دوازدەكەسیدا كۆ دەبوونەوە و بەرهەمە تازەكان لەو كۆڕانەدا دەخوێندەوە وبیر وبۆچوون سەبارەت بەو بەرهەمانە تاوتوێ دەكران. پاش دامەزراندنی ئەنجومەن ماوەی 10 ساڵ وەك بەرپرسی ئەنجومەن كار دەكات و دەیان ئەدیب و نووسە وشاعیری بۆكانی بەرهەمی ئەو ئەنجومەنن.

چیرۆكەكانی بۆ زمانەكانی ئینگلیزی، ئەڵمانی، فەرەنسی و فارسی وەرگێڕدراون

ناسر لە ساڵی 1990ەوە بەردەوام خەریكی نووسین و وەرگێران بەزمانی كوردی بووە. ساڵی1990 كۆچیرۆكی « خەوەڕاو»ی لەسەر ئەركی خۆی لە چاپ داوە و بەردەوام لە گۆڤارەكانی سروە،ئاوێنە و زرێبار لە ئێران و لە باشووری كوردستانیش لە  ئایندە، رامان و سەردەم وتار وچیرۆكی بڵاوكردۆتەوە.
ساڵی 1997 كۆچیرۆكی هاوار لە لایەن ناوەندی چاپ و بڵاوكردنەوەی محەمەدی سەقز چاپ و بڵاوكراوەتەوە.
ساڵی 2005 كۆچیرۆكی خەونەكانی ئیقلیمی- با - لەلایەن دەزگای چاپ و پەخشی ئاراس لە هەولێر بڵاو كراوەتەو.
ساڵی 2004  لەگەڵ عەلی ئەشڕەف دەرویشیان كۆمەڵێك چیرۆكی كوردیان لە كوردییەوە كردۆتە فارسی بە ناوی «داستان های كوتاە از نویسندگان معاصر كرد» كۆمەڵێك كورتە چیرۆك، لە نووسەرانی هاوچەرخی كوردەوە، ئەم كۆمەڵە چیرۆكە لەلایەن ناوەندی چاپ و بڵاوكردنەوەی»چشـمە»وە لە تاران چاپ و بڵاو كراوەتەوە. 
كۆچیرۆكی لێرە خەونەكان بەرئاوەژوو دەبنەوە ساڵی 2024 لەلایەن دەزگای موكریانەوە چاپ و بڵاو كراوەتەوە.  
ناسر وەحیدی جگە لەوەی وەك چیرۆكنووس كاری كردووە، هەوڵیداوە ژمارەیەك لە بەرهەمە فارسی و جیهانییەكانیش بكاتە كوردی. كۆمەڵە چیرۆكی «رەنگدانەوەی خەونەكان» كۆمەڵێكی چیرۆكی فارسی و بیانییە كە لە زمانی فارسییەوە كراوە بە كوردی و ئامادەی چاپ و بڵاوكردنەوەیەو تا ئێستا بڵاو نەكراوەتەوە.
ناسر وەحیدی لەو نووسەرە كوردانە كە بەرهەمەكانی بە زمانەكانیتر وەرگێڕدراون. وەك خۆی باسی دەكات تا هەنووكە چەند چیرۆكێكی بۆ زمانەكانی ئینگلیزی، ئەڵمانی، فەرەنسی و فارسی وەرگێڕدراون.