لە هەموارێکی پێشنیازکراوی مادەی 57 ی یاسای باری کەسێتی، مافی دایکایەتی لە عیراق دەکەوێتە مەترسییەوە. لەو بارەیەوە، شاناز ئیبراهیم ئەحمەد وتارێکی نووسیوە و هەمووان لە مەترسییەکەی ئاگادار دەکاتەوە.
لەو بارەیەوە شاناز ئیبراهیم ئەحمەد لە وتارێكدا كە بۆ پێگەی CNNی ئەمریكی نوسیویەتی، رایگەیاند: خێزان بناغەی سەرەكی كۆمەڵگە و قوتابخانەی یەكەمی پێگەیاندنی كەسێتی منداڵە، هەمووشمان دەزانین كە بەهەشت لە ژێر پێی دایكاندایە، زۆرجاریش دایكان بوونەتە بەخێوكاری خێزان و لە سایەی بارودۆخە سەخت و دژوارەكاندا بە تەنیا منداڵەكانیان پەروەردە كردووە.
هەروەها وتیشی: ئێمە باسی مافەكانی منداڵ و یاسای پاراستنی منداڵ دەكەین، چونكە منداڵەكان دواڕۆژی ئێمەن. بەڵام لام سەیرە كە ئێستا هەوڵ هەیە بۆ هەمواركردنی مادەی (57) لە یاسای باری كەسێتی ساڵی 1959، ئەو هەموارە پێشنیازكراوە بڕگەكانی تایبەت بە مافی دایك بۆ لەخۆگرتنی منداڵەكانی دەسڕێتەوە، ئەوەش دەبێتە هوێ لەباربردنی مافەكانی ژنان و هەموو ئەو شتانەی كە بەدرێژایی دەیان ساڵ خەباتمان بۆ كردوون.
لە وتارەکەیدا، شاناز ئیبراهیم ئەحمەد ئاماژە بەوە دەدات، بەپێی مادەی (57) لە یاسای باری كەسێتی ساڵی 1959، دایك مافی بەخێوكردنی منداڵەكانی هەیە لەكاتی هاوسەرگیریی و دوای جیابوونەوە تاکو تەمەنی منداڵەکان دەگاتە 15 ساڵ، دواتر دەتوانن بڕیار بدەن لەگەڵ دایك یان باوكیان بژین، بەڵام بەپێی هەموارە پێشنیازكراوەكە، منداڵ كە تەمەنی گەیشتە 7 ساڵ دەتوانێت ئەو بڕیارە بدات، ئەگەریش باوكی مرد، مافی باپیریەتی بەخێوی بكات، هەروەها ئەگەر دایكی هاوسەرگیری دووەم بكاتەوە بۆی نییە منداڵەكانی بەخێو بكات، ئەگەریش هاوسەرگیری کردەوە و باپیریشی مرد منداڵەكە رەوانەی خانەی بێسەرپەرشتان دەكرێت.
شاناز ئیبراهیم ئەحمەد باسی لەوەشكردووە، لە ساڵانی رابردوودا هەوڵی زۆر هەبوون بۆ هەمواركردنی ئەو مادەیە بەڵام گەلی عیراق بە تەواوی ئەو هەوڵانەی رەتكردووەتەوە، ئەگەر ئەو مادەیە هەموار بكرێت ئەوا ژنان ناچاردەبن لە پەیوەندییەكی هاوسەرگیری خراپدا بمێننەوە تەنیا بۆ ئەوەی لەگەڵ منداڵەكانیان بن.
ئەوەشی خستەڕوو ئەو بابەتە تەنیا بابەتێكی رەگەزی و ژنانە نییە، چونكە مافی ژن و مافی منداڵ لە بنەڕەتدا مافی مرۆڤیشە. ئەگەر مافەكانی ژنان و منداڵان پێشێل بكرێت و لە پارێزبەندی دەستووری بێبەش بكرێن ئەو كات نۆرەی كێی تر دێت؟ بێبەشەكردنی مافی هاوڵاتیبوون لە ژنان و كەمینە ئاینییەكان و كەمئەندامەكان دژ بە كۆمەڵگەی لێبوردەیی و فرەییە، بۆیە پێویستە پارێزگاری لە دەستوورمان بكەین بۆ ئەوەی پارێزگاری لە عیراق بكەین وەك وڵاتێكی دیموكراسی.
