کەلەپووری کوردەواری دەپارێزێت

سەیدا گۆیان، چالاكوانێكی باکوور لە بواری کەلتوردا

11:11 - 2024-06-09
کەلتور
90 جار خوێندراوەتەوە
بەشێک لە مۆزەخانەکەی سەیدا گۆیان

ئامادەکردنی: 
لاپەڕەی باکووری کوردستان

سەیدا گۆیان چالاكوانێكی كوردی باکوورە کە ساڵانێکی زۆرە لە بواری كەلتور و کەلەپووردا كار دەکات بەمەبەستی پاراستنی كەلتور و كەلوپەلی فۆلكلۆریی كوردەواری و خاوەنی چەندین چالاكییە لەسەر ئاستی میللی.
لەوبارەیەوە سەیدا گۆیان لە ئامەد -ەوە بە كوردستانی نوێی راگەیاند: لە سەرەتای ساڵی 1993وە تا ئەمڕۆ، بەردەوام سەرقاڵی كۆكردنەوەی گەنجینەی كەلتور و فۆلكلۆری كوردییە و وتی: «بەشێوەیەكی ئەكادیمی و گشتی كار بۆ كۆكردنەوەی فۆلكلۆری كوردی و دیكۆمێنتكردنی ژیانی رەوەند و كۆچەرە كوردەکان دەکەم و بەدواداچوونم بۆ ژیانی كوردەواری رەسەن کردووە».

بۆ پاراستنی كەلتوری كوردەواری، ماڵەكەی تەرخانكردووە بۆ پاراستنی کەرەستەی فۆلكلۆریی كوردی و لە مۆزەخانەکەیدا پاراستوونی

خرراسان و لوڕستانیشی فەرامۆش نەکردووە
هەروەها وتی: «یاریی منداڵان و چەندین جۆر خواردنی كوردەواری و جلوبەرگی جۆراوجۆری كۆنی ژنانە و پیاوانەی كوردیم لە هەموو ناوچە و پارچەكانی كوردستان و تەنانەت جلوبەرگی كوردی لە خۆراسان و لوڕستانیش كۆكردووەتەوە و دیكۆمێنت و ئەرشیفم كردوون. 
ئەو چالاکوانە ئاماژەشی دا بەوەی کە بە مەبەستی پاراستنی ئەو كەلتورە كۆنەی كوردەواری بۆ نەوەكانی داهاتووی كورد، ماڵەكەیی تەرخانكردووە بۆ پاراستنی فۆلكلۆری كوردی لە مۆزەخانەکەیدا پاراستوونی.
وتیشی: هەر كەلوپەلێكی كوردی جا لەهەر پارچەیەكی كوردستان و جیهاندا بینیبێتم چ لە رێگەی سۆشیال میدیاوە یان لە رێگەی میدیاکان و بەتایبەتی تەلەفزیۆنەوە، یاخود  لە رێی هاوڕێكانمەوە پەییم پێ بردبێت، بەهەر نرخێك بووە کڕیومە و لە مۆزەخانەكەمدا پاراستوومە. 
لەبەشێکی دیکەی قسەکانیدا سەیدا گۆهان دەڵێت: زیاتر لە 1000پارچە كەلوپەلی كۆنی كوردەوارییم لە ژوورەكانی مۆزەخانەکەمدا پاراستووە و ئەمەی من کردووەمە مۆزەخانەی كوردستانە و روونیشیکردەوە کە ئەو تەنها وەک خۆبەخشێك ئەو كارە دەكات و خۆی بە خزمەتكار و پارێزەری کەلەپووری کوردی دەزانێت.
جەختیشی لەسەر ئەوە کردەوە کە ئەگەر پاڵپشتیی نیشتمانپەروەران و دەوڵەمەندەكانی كوردستانی هەبێت، ئەوا مۆزەخانەیەكی گەورەی ئێتنۆگرافی دادەمەزرێنێت كە مێژووی ژیانی كوردەواری و گەلی كورد بە گشتی لەخۆبگرێت و زیاتر پەرە بەكارەكەی دەدات و بەرەوپێشی دەبات. 
شەش کتێب وەک تۆمار
وەک خۆی دەڵێت: زۆر لە پەرلەمانتارانی توركیا و ئەكادیمیستەکان و رۆژنامەنووسان سەردانی مۆزەخانەكەی دەكەن و دڵخۆشیی خۆیان بە كارەكانی دەردەبڕن.
 لەوەش گرنگتر دەڵێت: «شەش كتێبم بە زمانی كوردی –(پیتی کرمانجی – لاتینی) چاپ كردووە، كە تێیدا باس لە چیرۆك و ستران و لاوك و دەنگبێژانی هەموو بەشەكانی كوردستان دەكەم و ناوەڕۆكی كتێبەكانیش زۆر بەرفراوانە و رابردوو و مێژووی قارەمانێتی گەورە پیاوانی كوردم بەشێوەی نووسراو لەسەر زاری خەڵكی شارەزاوە تۆماركردووە، چونكە ئەمە سامانێکی نیشتمانییە و پێویستە بەزیندوویی بپارێزرێت.

ئەگەر ئەو کارەی نەکردایە، چی رووی دەدا؟
جێی ئاماژەیە سەیدا گۆیان خەڵكی پارێزگای شیڕناخە و چالاكییەکانی لەو بوارەدا لە ئامەد دەکات و وەک راشیدەگەیەنێت: چەندین چاوپێكەوتنی رۆژنامەوانی و تەلەفزیۆنیی هەیە سەبارەت بە چالاكییەكانی لە بواری پاراستنی كەرەستەی كوردەواری لە هەموو بەشەكانی كوردستاندا و بەردەوامیش كار بۆ كۆكردنەوەی گەنجینەكانی كەلوپەلی كوردی دەكات. هەروەها پاراستنی كەلتور و نەریتی كوردی بەشێوەیەكی ئەكادیمی و دروستكردنی تۆمارێكی كەلتوریی ئێتنۆگرافی، وەك راپۆرتی نووسراو و چاوپێكەوتنی ڤیدیۆیی بە شێوەیەكی پیشەیی كارێكی گەورە و گرنگ دەبێت بۆ ناساندنی میللەتەكەمان بە جیهان. هەروەها دەڵێت: ئەگەر وا نەکەم ئەوا پشتگوێخستنیان دەبێتە مایەی لەناوچوون و لەدەستدانی زمان و مێژوو و دابونەڕیت و خواردن و جلوبەڕگی رەسەنی كوردی.

بابەتە پەیوەندیدارەکان