هێمن ئه‌حمه‌د
شوێنه‌واری كه‌ركوك لیژنه‌یه‌كی بۆ نۆژه‌نكردنه‌وه‌ی قه‌ڵای كه‌ركوك ده‌ستنیشانكردووه، كه له گشت پێكهاته‌كانی شاره‌كه پێكدێت. به‌ڕێوه‌به‌ری ماڵی رۆشنبیریی كه‌ركوكیش ته‌ئكیدده‌كاته‌وه كه ده‌بێت نۆژه‌نكردنه‌وه‌كان چوارچێوه‌یه‌كی ئه‌كادیمیی دروست وه‌ربگرێت و له خزمه‌ت شوێنه‌وار و ته‌لارسازیی شاره‌كه‌دا بێت.
په‌روین شوانی ئه‌ندامی ئه‌نجومه‌نی پارێزگای كه‌ركوك، له‌سه‌ر نۆژه‌نكردنه‌وه‌ی شوێنه‌واره‌كانی كه‌ركوك، له لێدوانێكدا، به‌كوردستانی نوێ-ی راگه‌یاندووه: به‌غدا ئه‌نجومه‌نی پارێزگای كه‌ركوكی ئاگاداركردووه‌ته‌وه كه پاره‌یه‌ك له بودجه‌دا بۆ نۆژه‌نكردنه‌وه‌ی به‌شێك له شوێنه‌واره‌كانی كه‌ركوك دابینبكات، كه قه‌ڵای كه‌ركوك سه‌ره‌كیترینیانه، وتیشی: ئێستا له هه‌وڵی ئه‌وه‌داین كه لیژنه‌یه‌كی هه‌ماهه‌نگ له هه‌موو پێكهاته‌كان دیاری بكه‌ین و ئێمه‌ش وه‌ك پێكهاته‌ی كورد له ئه‌نجومه‌نی پارێزگای كه‌ركوك له هه‌وڵی ئه‌وه‌داین كه نووسه‌ران و رۆشنبیران و ئه‌ندازیار و ته‌لارسازان كۆبینه‌وه بۆ ئه‌وه‌ی بگه‌ینه رووی راسته‌قینه‌ی مێژووی شوێنه‌واره‌كان، كه تا ئێستا دوو كۆبوونه‌وه‌ی گرنگمان كردووه له‌گه‌ڵ لایه‌نه په‌یوه‌ندیداره‌كاندا بۆ سه‌ركه‌وتنی كاری نۆژه‌نكردنه‌وه و راسپارده و پێشنیاری گرنگیش گه‌ڵاڵه‌كراوه.
هه‌ر له‌وباره‌یه‌وه، سمكۆ به‌هرۆز شاره‌زا له مێژووی كه‌ركوك و شوێنه‌وار، پێیڕاگه‌یاندین: له‌دوای پرۆسه‌ی ئازادیی عیراقه‌وه، چه‌ندین شوێنه‌وار كاریان تێدا كراوه، به‌ڵام نۆژه‌نكردنه‌وه‌كان چوارچێوه‌یه‌كی شوێنه‌واری و گرنگیان نه‌بووه و ئه‌وانه‌شی كاریان تێدا كردووه شاره‌زانه‌بوون له بواری ته‌لارسازی و نه‌خش و نیگاری شوێنه‌واریدا. وتیشی: هه‌ندێكجار له‌و نۆژه‌نكردنه‌وانه‌دا ده‌مارگیریی نه‌ته‌وه‌یی تێدا به‌كارهێنراوه و مێژووی شوێنه‌واریی هه‌ندێك شوێن ده‌شێوێنرێت.
هه‌روه‌ها، یوسف تاڵب به‌ڕێوه‌به‌ری ماڵی رۆشنبیریی كه‌ركوك، پێیوتین: به‌ڕێوه‌به‌رایه‌تییه‌كه‌مان راوێژ و پێشنیازه‌كانی له نۆژه‌نكردنه‌وه‌كاندا خستۆته‌ڕوو تا چوارچێوه‌یه‌كی ئه‌كادیمیی دروست وه‌ربگرێت و له خزمه‌ت شوێنه‌وار و ته‌لارسازیی شاره‌كه‌دا بێت.
