‎كەشی فێنك و سەرچاوەی ئاوی، هەزاران گەشتیار دەباتە هەڵەبجە

04:36 - 2024-06-20
ڕاپۆرت
420 جار خوێندراوەتەوە

‎بەهۆی گەرماو بوونی سەرچاوەی ئاوی، لە ناوچە گەشتیارییەكانی پارێزگای هەڵەبجە، ڕێژەیەكی زۆر گەشتیار سەردانی ناوچەكە دەكات و، لە ڕۆژانی جەژنی قوربانیشدا، زیاتر لە هەشتا هەزار گەشتیار سەردانی شوێنە گەشتیارییەكانییان كردووە

‎چیا قاسم، بەڕێوەبەری گشتی گەشت و گوزاری هەڵەبجە بە كوردستانی نوێی وت: بە بۆنەی هاتنی جەژنی قوربانی پیرۆزەوە ئامادەكاریمان كردبوو وە  بەردەوامیش ئامادەین بۆ پێشوازی كردن لە گەشتیاران، بۆ ئەم ساڵ هەندێك ڕێگەی ناوچەی 
‎گەشتیاری;  پێویستیان بە دانانی تابلۆ و ڕێنمایی و ڕەنگ كردنی ڕێگەی ناوچە گەشتیارییەكان هەبوو، كە بە هاوكاری بەڕێوەبەرایەتی پۆلیسی هاتووچۆی هەڵەبجە، ئەنجامماندا، وتیشی: تیمەکانمان لەسەرجەم شوێنە گەشتیارییەکان بوون و هەماهەنگیمان لەگەڵ هێزەکانی ئاسایش و پۆلیس و پۆلیسی هاتووچۆ و تەندروستی وبەرگری شارستانی وشارەوانی دا هەبووە و تیمی تایبەتمان دانا بۆ هەر حاڵەتێكی نەخوازراو 


‎ناوەچەی گەشتیاری هەڵەبجە

‎چیا قاسم، ئەوەشی وت: لە سنوری پارێزگای هەڵەبجە(٣٦) سی و شەش  ناوچەی گەشتیاری هەیە، كە لە نێویاندا ناوچەی شوێنەواری  و چارەسەری سروشتی و مێژووی ئاینی و سروشتی تێدایە، كە  هۆتێل و مۆتێل و خانە باخ و كابینەی گەشتیاری و ڕێستۆرانت و كافێش بەشێوەیەكی پێویست تێیاندا بوونی هەیە، هەروەها پێشبینیمان دەكرد، كە بەهۆی گەرماو جەژنەوەو، بوونی سەرچاوەی ئاوی لەناوچە گەشتیارییەکانمان;  ڕێژەی هاتنی گەشتیاران بەو ڕێژە زۆرەبێت


‎زیاتر لە هەشتا هەزار گەشتیار سەردانی هەڵەبجە دەكات

‎بەڕێوەبەری گشتی گەشت و گوزاری هەڵەبجە، لەبارەی ڕێژەیی سەردانی گەشتیاران، وتی: لە ماوەی تەنها چوار ڕۆژی جەژنی قوربانی پیرۆزدا، پێشوازیمان لە
‎(٨٤١٧٦)هەشتاو چوار هەزار و سەدو حەفتاو شەش گەشتیار كردوە، بۆ ناوچە گەشتیارییەکانی پارێزگای هەڵەبجە، وتیشی:  لیژنەکانی پشکنینیشمان توانیویانە بەشێوەیەی سەرکەوتوانە چاودێری نرخ و پاک و خاوێنی ناوچە گەشتیارییەکان بکەن، هەروەها توانیویانە(٤٠) چل سەرپێچی و ئاگادارکردنەوە تۆماربکەن، خۆشبەختانە هیچ ڕوداوێکی نەخوازراویش ڕوی نەداوە.


‎ڕاپۆرت/ محەمەد تۆفیق نەورۆڵی

بابەتە پەیوەندیدارەکان