دیداری / پیران شەمزینی
شانۆگەریش وەک کایەیەکی هونەری لە نێو میللەتی كورددا وەک کایەکانی دیکەی هونەر لەبرەودایە لە باکووری کوردستان، بەتایبەتیش لەناو كچان و كوڕانی كورددا لە هەموو پارچەکانی کوردستان و تەنانەت کە تاراوگەش.
بەفرین ئەمیتکەر وەک پێشەنگی ژنانی شانۆکار
شانۆکارە كوردەکان لەم سەردەمەدا بەتایبەتی گرنگیی زۆر بە هونەری شانۆ دەدەن و لەو رێگەیەوە ئێش و ئازارەكانی گەلەكەیان بە گەلانی جیهان دەگەیەنن. یەكێك لەو ژنانەش كە ساڵانێكی زۆرە لە بواری شانۆ لە باکووری کوردستان كار دەكات، بەفرین ئەمیكتەرە کە ژنێكی كوردی شاری ئامەدی باكووری كوردستانە و ساڵانێكی زۆرە لەگەڵ گروپێکدا لەو بوارەدا كار دەكات و لە شار و شارۆچكەكانی باكووری كوردستان و شارەكانی دیکەی توركیاشدا ناسراوە.
ئەو خانمە لە چەندین فێستیڤاڵی شانۆییدا بەشداربووە و خۆی و گروپەکەی بەرهەمی ناوازەیان پێشكەش بە بینەران كردووە.
لەوبارەیەوە بەفرین ئەمیكتەر، لە ئامەدەوە بە كوردستانی نوێی راگەیاند: 35 ساڵە لە بواری شانۆدا كار دەكات و شانۆ لە ژیانی كوردەواریدا گرنگییەكی زۆری هەیە و وتی: بەتایبەتی لە باکووری كوردستان و توركیا.
جاران سەربە شارەوانی بوو
روونیشیکردەوە کە لەگەڵ كردنەوەی سەنتەری رۆشنبیریی و هونەریی میزۆپۆتامیادا كە چەندین لقی لە شار و شارۆچكەكانی توركیادا هەیە، من لە تەمەنێكی بچووكەوە و لە ساڵی 1996ەوە دەستم کردووە بە كاری هونەری شانۆ و زۆریش دڵخۆشم پێی.
هەشت ژن و نۆ پیاو و شۆڕشێکی هونەری
هەروەها وتی: تیپی شانۆی ئامەد تیپێکی تەواو سەربەخۆیە و لە 16 كەس پێكهاتووە كە هەشت ژن و نۆ پیاوین، پێشتریش بە چاودێریی شارەوانی ئامەد كارمان دەكرد. بەڵام ئێستا بە شێوەیەكی سەربەخۆ لە ژێر ناوی تیپی شانۆی ئامەددا كار دەكەین.
دەشڵێت: ئێمە شانۆگەریی تایبەت بە خۆمان لە شارەكانی توركیادا نمایش دەكەین و لەگەڵ شانۆكارانی توركدا هاوئاهەنگی دەكەین. لەبارەی ئامانجەکەشیانەوە لەو هاوئاهەنگییە وتی: ئامانجمان گەیاندنی پەیامی برایەتیی نێوان نەتەوەكانی توركیا و پاراستنی زمان و كەلتوری كوردییە لەو وڵاتەدا بەگشتی.
بەفرین ئەمیتکەر: بەرهەمەکانمان لە شارەكانی تری توركیاش نمایش دەكەین و لەگەڵ شانۆكارانی توركدا هاوئاهەنگی دەكەین، چونکە ئامانجمان گەیاندنی پەیامی برایەتیی نێوان نەتەوەكانی توركیا و پاراستنی كەلتوری كوردییشە
بەفرین رۆڵی دەرهێنەرێکی ژنانە
بەفرین لەبارەی رۆڵی خۆیەوە لە ناو گروپەکەیدا دەڵێت: لە شانۆدا من رۆڵی دەرهێنەری دەبینم و لە زۆر بواری دیکەی شانۆشدا كاردەكەم و رۆڵی دەگێڕم.
جگە لەوەش بەشداریم لە زۆرێك لە فێستیڤاڵەكانی شانۆدا کردووە وەک فێستیڤاڵی شانۆی سەقز و ئامەد و لە چەندین شاری دیكەش بەشداریم كردووە و خەڵاتی باشترین ژنی شانۆی باكووری كوردستانم وەرگرتووە.
روونیشیکردەوە کە ئامانجی سەرەکیی ئەو پێشخستنی شانۆی كوردی و پێشخستنی دۆزی ژنانە لە هەموو بوارەكانی ژیان و بەتایبەتی شانۆ و نواندندا.
وتیشی: جێگای خۆشحاڵی و شانازییە كە ئێستا ژنان لە باکووری کوردستان و تورکیادا بەگشتی رۆڵێكی زۆر گرنگ لە شانۆدا دەگێڕن و بۆخۆم زیاتر گرنگی بە رۆڵی ژنان دەدەم لەو کایە هونەرییەدا و زیاتر کاری دەرهێنان بۆ ژنان دەكەم.
هاتنەدەرەوەی ژنان لە ناو دیوارەکانی ماڵەوە
جەختیشی لەوە کردەوە کە ژنان دەسەڵات و هێزیان هەیە و پێویستە لە هەموو بوارە سیاسی و هونەرییەکاندا رۆڵی بەرچاوی خۆیان بگێڕن، بە بڕوای ئەو كاری ژنان تەنها ئەوە نییە لە ماڵەوە دانیشن و منداڵ بەخێوبكەن. بۆیە گرنگی بە رۆڵیان دەدات لە شانۆدا، چونکە وەک خۆی دەڵێت: هونەری شانۆ دەتوانێت بەدواداچوون بۆ هەموو كێشە و گرفتە كۆمەڵایەتییەكان بكات و بیانخاتە سەر زمان.
هەروەها وتی: گروپەكەمان گرنگی بە نمایشكردنی شانۆی بیانی و چیرۆكی كوردی و داستانەكانی مێژووی كوردستان دەدات.
بەبڕوای بەفرین كاری هونەری شانۆ بریتییە لە خستنەڕوو و دەستنیشانكردنی كێشەی شارەكان و هۆشیاریی كۆمەڵایەتی و لە هەموو بوارەكانیشدا دەتوانێت پەیامی خۆی بگەیەنێت.
پاراستنی زمان و کەلتوری کوردی
پێشیوایە شانۆ شوناسێكی كۆمەڵایەتییە بەتایبەتی ئێستا زۆر گرنگە میللەتی كورد كە خاوەنی زمان و كەلتور و مێژووی خۆیەتی لە رێگەی هونەری شانۆوە زیاتر ئاگاداری خۆمان و رابڕدووەکەمان بین و بیپارێزین.
خاتوو بەفرین راشیگەیاند: پەیامی هەرە گەورەیان ئەوەیە كە شانۆگەرییەكانیان بە زمانی كوردی نمایش دەكەن، ئەوەش بۆ پاراستنی زمانی دایك لە باكووری كوردستان و ناوچەکانی دیکەی توركیا.
