دوێنێ، مەسرور بارزانی سەرۆكی حكومەتی هەرێم، لەگەڵ بەڕێوەبەری ژمارەیەكی زۆر لە دەزگاكانی راگەیاندنی كوردستان كۆبۆوە.
سەرەتا، سەرۆكی حكومەت ئاماژەی بەوەدا كە مەبەست لە كۆبوونەوەكە ئەوەیە گفتوگۆیەكی راشكاوانە لەگەڵ راگەیاندن و لەڕێگەی ئەوانیشەوە، لەگەڵ خەڵكی كوردستان بكەین بۆ بەرچاوڕوونی و خستنەڕووی زانیاری و روونكردنەوەی هەڵوێستی حكومەت لەبارەی چەندین بابەتی گرنگ. داواشی لە دەزگاكانی راگەیاندن كرد، كە هاوكار و یارمەتیدەری حكومەت بن بۆ سەرخستنی پرۆسەی چاكسازی و رووبەڕوبوونەوەی گەندەڵی. ئاماژەشی بەوەدا كە راگەیاندن ئەركێكی پیرۆز و گرنگی هەیە و پێویستە بە بەرپرسیارێتییەوە ئەركەكانیان جێبەجێ بكەن.
دووپاتیشیكردەوە، كە حكومەتی هەرێم، پشتیوانی لە ئازادیی راگەیاندن و رادەربڕین و رەخنەگرتن دەكات بۆ چاكسازی و باشتركردن و بەرەوپێشبردنی بارودۆخی كوردستان، بەڵام لە هەمانكاتدا پێویستە راگەیاندن داكۆكیش لە پرسە نیشتمانییەكان و دەستكەوتەكان بكات، كە لە ئەنجامی قوربانیدانێكی زۆری خەڵكی كوردستانەوە، بەدەستهاتوون.
باسی لەوەش كرد كە كابینەی نۆیەم، زۆرترین زانیاری بڵاوكردۆتەوە و روونكردنەوەی پێویستی بە پەرلەمانی كوردستان و رای گشتی داوە.
لە درێژەی قسەكانیدا، سەرۆكی حكومەت، روونیكردەوە كە ئێمە لە ناوچەیەكی قەیراناوی و نائارامدا دەژین، لە ساڵانی رابردووشدا رووبەڕووی چەندین قەیران بووینەوە، وەك كۆرۆنا و قەیرانی تەندروستی و دارایی، بەڵام سەرەڕای ئەمەش، ئێمە نەوەستاین و بەردەوام بووین لە جێبەجێكردنی پڕۆژە و چەندین چاكسازیمان لە سەرجەم بوارەكاندا كردووە، وتیشی: چاكسازی، پرۆسەیەكی بەردەوامە و كاتی پێویستە و ئامانجیش لەم چاكسازییانە، بنیاتنانی ژێرخانێكی بەهێزی ئابوورییە.
جەختیشیكردەوە، كە حكومەت هی هەموو هەرێمی كوردستانە و بەبێ جیاوازییش، خزمەتی هەموو پارێزگا و شار و ناوچەكانی كوردستان دەكات.
لەبارەی پەیوەندیی لەگەڵ حكومەتی فیدراڵی، سەرۆكی حكومەت دووپاتیكردەوە كە هەرێمی كوردستان، هەمیشە ئامادەبووە كێشەكان لەگەڵ بەغدا لەسەر بنەمای دەستوور چارەسەربكات، هەرێمی كوردستان ئەركەكانی جێبەجێكردووە و داواش دەكات مافە دەستوورییەكانی پێشێل نەكرێت.
لە كۆتاییدا سەرۆكی حكومەت، وەڵامی سەرنج و تێبینی و راسپاردەی ئامادەبووانی دایەوە و كورتەیەكیشی دەربارەی چاكسازییەكانی كابینەی نۆیەمی حكومەتی هەرێم لە بوارە جیاوازەكاندا خستەڕوو.
