لە میدیای عەرەبییەوە

دەستگیركردنی 345 كەس بەتۆمەتی بازرگانییكردن بە مرۆڤەوە
عەمید میقداد میری وتەبێژی وەزارەتی  ناوخۆی عیراق بە رۆژنامەی الصباح-ی راگەیاندووە: ئەمساڵ وەزارەتی ناوخۆی عیراق هەوڵەكانی بۆ دەستگیركردنی ئەو كەسانەی بازرگانی بە مرۆڤەوە دەكەن، چڕتركردۆتەوە. وتیشی: لە ماوەی شەش مانگی پێشوودا، 345 كەس بەتۆمەتی بازرگانیكردن بە مرۆڤەوە دەستگیركراون. راشیگەیاند: ئەمساڵ بەراورد بە ساڵی رابردوو، لە بەغدا، تاوانەكان بە رێژەی 28 %  كەمیكردووە. 
الصباح

كشانەوەی هێزەكانی ئەمریكا لە عیراق 3 بۆ 5 ساڵی دەوێت
بڕیارە لەم مانگەدا وەفدێكی عیراق بەسەرۆكایەتی عەبدولئەمیر رەشید یارەڵڵا سەرۆك ئەركانی سوپای عیراق، سەردانی واشنتۆن بكات و لەگەڵ لێپرسراوانی وەزارەتی بەرگریی ئەمریكادا كۆببێتەوە، تێیدا باسی كشانەوەی هێزەكانی ئەمریكا لە عیراق دەكەن. 
سەرچاوە سیاسییەكان بە رۆژنامەی «المدی»یان راگەیاندووە: پێدەچێت كشانەوەی هێزەكانی ئەمریكا لە عیراق،  ماوەی 3 بۆ 5 ساڵی پێ بچێت. 
المدی

حوسییەكان و مقاوەمەی ئیسلامی  سێ هێرشیان لە دەریای سوور ئەنجام داوە
گروپی حوسییەكانی یەمەن لە بەیاننامەیەكدا رایانگەیاندووە: بە هاوبەشی لەگەڵ گروپی «مقاوەمەی ئیسلامی لە عیراق» سێ هێرشی سەربازییان لە دەریای سوور  ئەنجامداوە. 
لە بەیاننامەكەدا هاتووە: لە دەریای سوور بە درۆن هێرشیان كردۆتەسەر كەشتی «بنتلی» لەهەمانكاتیشدا بە كەشتی بۆمبڕێژكراو،  هێرشیان كردۆتە سەر كەشتی بارهەڵگری نەوتی كایوس لاین. 
سكای نیوز

لە عومان چوار كەس كوژران
پـــۆلیسی عومان رایگەیاندووە: لە نزیك  مزگەوتێك  لە ناوچەی  «وادی ئەلكەبیر» سەر بە شاری مەسقەتی پایتەخت،  لە رووداوێكی تەقەكردندا، چوار كەس كوژراون و چەندین كەسی تریش برینداربوون، پۆلیس هەموو رێوشوێنێكی ئەمنیی توندی گرتۆتەبەر، بۆ لێكۆڵینەوە لە رووداوەكە. 
لەلایەكی ترەوە پەیامنێری كەناڵی روسیا الیوم لە مەسقەت رایگەیاندووە: ئەو مزگەوتە زیاتر رەوەندی  پاكستانی شیعە مەزهەب سەردانی دەكەن  و خەریكی مەراسیمی عاشورا بوون.
روسیا الیوم