دناڤ سوشیال میدیایێ دا چەندین گروپ و پەیچ هەنە و گەنجان ل خوە خرڤەدكەن، ژوان گروپێن مفادار و خزمەتەكێ دگەھینن، گرۆپێ (ڤەژینا جڤاكناسێن گەنج)ە و دا بزانین كارێ ڤی گرۆپی چییە و چ پێش كێش دكەت، ئێك ژ سەرپەرشتێن گرۆپی گوت: «ئەڤە گرۆپە ل دوماهیکا ساڵا 2023 لسەر دەستێ خوێندکارێن پشکا کۆمەڵناسی هاتییە دامەزراندن، پاشی ئەندامێن گروپێ ناڤبری مەودایێ چاڵاکی و ئارمانجێن خۆ بەرفرەهتر لێ کرن و دەست ب ئەنجامدانا پێشهات و پێشکێشکرنا سمینارا کرن دناڤ زانکۆیێ و هەروەسان ژ دەرڤەی زانکۆیێ ژی». (هەرژین محەمەد) زێدەتر گوت: «ئەڤ گروپە بشێوەیەکێ بەردەوام د تۆڕێن کۆمەڵایەتی دا بابەت و گوتارێن زانستێن جڤاکی بگشتی و کۆمەڵناسی بتایبەتی بەلاڤ دکەن و ئارمانجا سەرەکی یا گروپی، بەلاڤکرنا هۆشیاریێ یە لسەر بابەتێن گرێدایی جڤاکی و دیدا وان ئاڤاکرن و بهێزکرنا تاکێن جڤاکی یە ب زانین و زانستێ کۆمەڵناسی برێکا سمینار، ورکشوپ، چالاکی و گوتارێن زانستی».
ئا: فوئاد سەلمان
