ئا: كوردەوان محەمەد سەعید
ماریۆ دراگی سەرۆكی پێشووی بانكی ناوەندی ئەوروپا لە راپۆرتێكی 400 لاپەڕەییدا هۆشدارییەكی توندیدا لەبارەی بارودۆخی ئابووریی ئەوروپاوە و پێی وایە داهاتوویەكی باش چاوەڕێی وڵاتانی ئەوروپا ناكات، كێشەكانیش وردە وردە و لەسەرخۆ دروستبوون و كەڵەكەبوون، ئەویش بەهۆی ساڵانێكی زۆر لە پشتگوێخستنی بواری ئابووری و وەبەرهێنانەوە.
ماریۆ پسپۆڕی ئابوورییە و ماوەیەكیش سەرۆك وەزیرانی ئیتاڵیا بووە، نموونەی رووخانی هەندێك بەشی پردێكی شاری درسدنی ئەڵمانیا دەهێنێتەوە و باس لەوە دەكات، كە ئەو پردە هیچ شتێكی بەرنەكەوتبوو، لەگەڵ ئەوەشدا رووخا، راستە رووخانەكەی زیانی گیانی بە دواوە نەبوو، بەڵام رووخانی پردێك بێئەوەی هیچی بەربكەوێت، ئەوە رەنگدانەوەی واقیعی ئابووریی ئەوروپایە، چونكە رووخانی پردێك بەو شێوەیە، مانای شكستی وەبەرهێنانە لە ژێرخانی وڵات و چاكردنەوەدا.
ماریۆ، رووخانی هەندێك بەشی پردێكی شاری درسدنی ئەڵمانیا بە نموونە دەهێنێتەوە و دەڵێ: رووخانی پردێك بێئەوەی هیچی بەربكەوێت، ئەوە رەنگدانەوەی واقیعی ئابووریی ئەوروپایە و مانای شكستی وەبەرهێنانە لە ژێرخانی وڵات و چاكردنەوەدا
پێویستە وەبەرهێنان زیاد بكات
ئەو پسپۆڕە ئاماژەی بەوەشكرد، كە ئابووریی ئەوروپا تووشی قەیران و رووداوی كتوپڕ نەبووە، بەڵكو بەهۆی پشتگوێخستن و كەمتەرخیی بەردەوامەوە، وردە وردە تووشی داخوران بووە.
ماریۆ دراگی لە راپۆرتەكەیدا جەخت لەسەر ئەوە دەكاتەوە، كە ئەوروپا پێویستە ئاستی وەبەرهێنانی زیاد بكات و ساڵانە بڕی 800 ملیار یۆرۆ بۆ ئەو مەبەستە تەرخان بكات، بۆ ئەوەی ئابوورییەكەی سەرپێ بكەوێتەوە، لەمەودواش ناتوانێ پشت بە هۆكارە باوەكانی گەشەی ئابووریی ببەستێ، وەك بەرزبوونەوەی خواستی جیهانی و دەستكەوتنی وزەی هەزران لە روسیا، چونكە زۆر ئاستەنگی لەبەردەمدایە، لەوانە: گۆڕینی دیموگرافی و كەمبوونەوەی ژمارەی دانیشتوان و كێشەی خاوبەڕێوەچوونی پرۆسەی بەدیجیتاڵكردنی ئابووری، ئەمانە هەمووی وایانكردووە داهاتوویەكی باش چاوەڕێی كیشوەری ئەوروپا نەكات، كە بە كیشوەرە پیرەكە ناسراوە.
لە دوای پەتای كۆرۆناكەی 2020 و دواتریش هەڵایسانی جەنگی ئۆكرانیا و روسیاوە، ئەوروپا رووبەڕووی قەیرانی هەڵاوسانی نرخی خۆراك و سووتەمەنی بۆوە، بەڵام ئەم كێشەیە ماریۆ دراگی باسی دەكات قورسترە و ئابووریی ئەوروپا بەرەو سیستیی دەبات.
سەرچاوە: رۆژنامەی ئەلسەباح
