قوباد تاڵەبانی، جێگری سەرۆک وەزیران پێشوازیکرد لە میشیل مایکل نایتۆن، بەڕێوەبەری پێشووی یانەی مانچستەریونایتێد کە بە مەبەستی وەبەرهێنان لە کەرتی وەرزشدا سەردانی سلێمانی کردووە.
میشیل مایکل نایتۆن کە لە ساڵانی ٢٠٠٩ بۆ ٢٠١٩ بەڕێوەبەری یانەی مانچستەریونایتێد بووە و لە ئێستادا وەبەرهێنەرێکی ناسراوی وەرزشییە، لە کۆبوونەوەکەی لەگەڵ قوباد تاڵەبانی، ئامانجی سەردانەکەی ڕوونکردەوە و خواستی خۆی بۆ وەبەرهێنان لە کەرتی وەرزشی کوردستان دەربڕی.لە کۆبوونەوەکەدا باس لە دۆخی وەرزشی کوردستان کرا.
قوباد تاڵەبانی ئاماژەی بەوەکرد کە یەکێک لە ئەولەوییەتەکانی بە پیشەیی کردنی وەرزشە تا وەرزش لە دەرەوەی حەز و خولیاوە، ببێتە سەرچاوەیەکی داهات بۆ وەرزشوانان و هانی وەبەرهێنەران دەدەن لەم بوارەدا وەبەرهێنان بکەن.
هەر لە دیدارەکەدا جێگری سەرۆک وەزیران ئامادەیی خۆی دەربڕی بۆ هەر جۆرە هاوکاری و کارئاسانییەک بۆ وەبەرهێنان لە بواری وەرزشدا و هیواشی خواست ئەم سەردانە هاندەرێک بێت تا هەم وەبەرهێنەری ناوخۆ و هەم وەبەرهێنەرانی بیانی زیاتر گرنگی بدەن بە وەبەرهێنەران لە بواری وەرزشدا و وتیشی لە پێشكەشکردنی هیچ جۆرە هاوکاری و کارئاسانییەک بۆ وەبەرهێنان لەم بوارەدا درێخی ناکەین.
