بەشداریکردنی هەموو هێز و لایەنە سیاسییەکان لە حکومەتدا فاکتەرێکی گرنگی سەقامگیرییە

بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغدا چاویکەوت بە سەید عەمار حەكیم، سەرۆكی رەوتی حیكمە.
لەدیدارێکدا کە دەرباز کۆسرەت رەسوڵ، کارگێڕی مەکتەبی سیاسی و رزگار حاجی حەمە، ئەندامی مەکتەبی سیاسی و فەیسەڵ کەریم خانی برادۆست ئامادەبوون، گفتوگۆکرا لەبارەی زاڵبوون بەسەر ئاستەنگە سیاسییەکان، چارەسەرکردنی کێشەکان و یەکخستنی ھەوڵەكان بۆ پێکھێنانی حکومەتی نوێی عیراق و تەواوکردنی ھەنگاوە دەستوورییەکان.
بافڵ جەلال تاڵەبانی، سەرۆکی یەکێتیی نیشتمانیی کوردستان سوربوونی یەکێتی بۆ رەخساندنی زەمینەی لەبار بۆ دەستپێکردنی گفتوگۆی بونیادنەرانە دووپاتکردەوە و رایگەیاند، بەشداریكردنی هەموو هێز و لایەنە سیاسییەكان لە حكومەتدا فاكتەرێكی گرنگی سەقامگیرییە و دەبێت هەموومان پێكەوە هەوڵ بۆ داهاتوویەكی گەشتر بدەین.
لەبەرامبەردا سەید عەمار حەکیم بە گرنگییەوە باسی لە پێگە و هەوڵەکانی سەرۆک بافڵ کرد لە لێکنزیککردنەوەی لایەنەکان و پێکهێنانی حکومەت و وتی، یەکێتی هێزێکی گرنگ و کاریگەرە و مێژوو ئەمەی سەلماندووە. رۆڵی گرنگی بینیووە لە بەگژداچوونەوەی دیکتاتۆرییەت و ئامادەیی تەواوی هەبووە لە رووداوە سیاسییەکاندا. رابەری کۆچکردوو سەرۆک مام جەلال هەمووانی لەژێر سایەی حەکیمانەی خۆیدا کۆکردبووەوە و عیراقی بردە قۆناغێکی نوێی تەبایی و پێکەوەژیانەوە. بۆیە ئێستاش پێویستمان بە هەمان روانینە بۆ سیاسەت و دڵنیاین یەکێتیی نیشتمانیی کوردستان درێژەپێدەری ئەو رێبازە دەبێت.

#بافڵ جەلال تاڵەبانی #یەكێتیی نیشتمانیی كوردستان #بەغدا