فلاشی ئابووری

ل: ئابووری

سودانی چەند رێنماییەكی نوێی بۆ سیستمی دارایی دەركرد

 نووسینگەی راگەیاندنی سەرۆك وەزیرانی عیراق لە بەیاننامەیەكدا رایگەیاند: بەو پێیەی زۆربەی چالاكییە بانكییەكان لە چوارچێوەی چاكسازیی دارایی و بانكیدا لە بەغدای پایتەخت چڕ بۆتەوە، محەمەد شیاع ئەلسودانی چەند رێنماییەكی نوێی دەركرد.

بە گوێرەی ئەو بەیاننامەیە رێنماییەكان بریتین لە زیادكردنی لقی بانكەكان لە پارێزگاكان و پابەندكردنی سەرجەم پارێزگاكان بە جێبەجێكردنی سیستمی ئەلیكترۆنی و دەستپێكردنی هەڵمەتێكی هۆشیاركردنەوەی هاووڵاتییان سەبارەت بە سیستمی نوێی دارایی.
سۆمەرییە نیوز

نرخی خۆراك لەسەر ئاستی جیهان بەرز بۆوە

رێكخراوی خۆراكی جیهانیی سەر بە نەتەوە یەكگرتووەكان كە بە (FAO) ناسراوە لە تازەترین راپۆرتیدا رایگەیاند: نرخی خۆراك لەسەر ئاستی جیهان بە رادەیەك بەرز بۆتەوە، كە لە ماوەی 18 مانگی رابردوودا بەرزترین ئاستە.
ئاماژەی بەوەشكرد، بەرزبوونەوەی نرخی خۆراك، جگە لە گۆشت، سەرجەم شمەكە خۆراكییەكانی دیكەی گرتۆتەوە، بەڵام زەیتی رووەكی لە هەموو ماددە خۆراكییەكانی دیكە زیاتر گران بووە و نرخەكەی بە رێژەی %7.3 زیادیكردووە.
سكای نیوز

یەكێتیی ئەوروپا داوای غاز لە ئەمریكا دەكات

ئۆرسۆلا ڤۆن دێر لاین سەرۆكی كۆمیسیاری ئەوروپا رایگەیاند: پێشنیازی بۆ دۆناڵد ترەمپ-ی سەرۆكی تازە هەڵبژێردراوی ئەمریكا كردووە، غازی شلی سروشتی هەناردە بكات بۆ یەكێتیی ئەوروپا و لە جیاتی روسیا، ئەمریكا پێویستیی یەكێتیی ئەوروپا لە غاز پڕ بكاتەوە.
ئاماژەی بەوەشكرد، یەكێتیی ئەوروپا لەگەڵ ئەمریكادا بەرژەوەندیی هاوبەشیان هەیە و پێویستە دانوستان و گفتوگۆی بارەوە بكرێت، یەكێك لە بەرژەوەندییەكانیش غازی سروشتییە كە ئەوروپا پێویستیی پێیەتی.
سكای نیوز