راهێنەریان گۆڕی

تۆپی دەستی یانەی سلێمانی یارییەكی بردەوە و یارییەكی دۆڕاند

رۆژی چوارشەممە 11/12، یارییەكانی هەفتەی حەوتەمی خولی نوخبەی تۆپی دەستی یانەكانی عیراق دەستیانپێكرد و تا رۆژی هەینی ئایندە بەردەوام دەبن.
تیپی یانەی سلێمانی، تەنیا یانەی كوردستانی بەشداریی ئەم خولەیە، رۆژی چوارشەممە، بوو بە میوانی یانەی فتووەی موسڵ، بەڵام نەیتوانی یارییەكە بباتەوە و 22 - 26  بە فتووە دۆڕا، ئەمە لەكاتێكدا هەفتەی پێشوو یەكەم بردنەوەی خۆی لەم خولەدا تۆماركرد و 27 - 24 لە تیپی یانەی كوفەی بردەوە.
ئەم تیپە، پێشتر لەكۆی پێنج یاریی، چوار یاریی یەك لەسەر یەكی دۆڕاند، بۆیە بەناچاری ئیدارەی یانەكە بڕیاریاندا دەست لەكاركێشانەوەی راهێنەری پێشووی تیپەكە كەمال عەبدولواحید قبووڵ بكەن و كاپتن سۆران مستەفا -یان لە جێگای دانا، تیپەكەش لە پێنجەم یاریی خۆیدا بەسەرپەرشتیی راهێنەری نوێ، یەكەم بردنەوەی تۆماركرد، بەڵام لە دووەم تاقیكردنەوەیدا لە موسڵ، بە تیپی یانەی فتووە دۆڕا.
سەبارەت بە ریزبەندیی یانەکانیش، ئەم یانانە پلەكانی یەكەم تا پێنجەمیان گرتووە:
-1كەرخ 20 خاڵ.
-2جەیش 17 خاڵ.
-3 دیالە 17 خاڵ.
-4 حەشد 15 خاڵ.
-5 شورتە 15 خاڵ.