درەنگ نڤستن و درەنگ رابینەڤە

سیپەل ئیبراهیم

لڤێرە رۆلێ دەیك و بابان گەلەكێ گرنگە، دڤێت دەمەكێ رێكخستی بۆ زارۆكێن خوە و نڤستنا وی دانن، هەكە خوە بخوازیتە وێ چەندێ ئەو ژی دەمێ نڤستنا خوە دگەل یا زارۆكێن خوە رێكبێخن ژ پێخەمەت، ئەڤ زارۆكێ هەنێ چاڤلێكرنێ بۆ دەیبابێن خوە نەكەت

ل قوتابخانێ ئەز گەلەك تێبینییا قوتابیێن خوەدكەم و ئێك ژ ئەگەرێن راستەوخۆ كارتێكرنێ ل ئاستێ زیرەكییا قوتابی دكەت، نڤستنا وییە، كا ئایا تێر خەو بوویە یان نە. رەنگە دەیباب گرنگییێ ب نڤستنا زارۆكێن خوە نەدەن و دێ پرسیاركەن بوچی ئاستێ زارۆكێ وان یێ لاوازە؟ گەلەك جاران مە ل قوتابخانێ پرسیارێن درەنگ نڤستن و درەنگ رابینەڤەیا قوتابی ژ دەیبابێن وی كرینە و ئەوان گوتییە ما ئەم دێ چ لێكەین زوی نا نڤن. بێی ئەو ھزر بكەن كو ئەڤ شێوازێ نڤستنێ و تێر نە نڤستنێ دێ كاریگەریەكا خراب ل سەر ئاستێ وی یێ زانستی، ل سەر رەفتارێن وی دناڤ قوتابخانێدا و خوە ل مالێ ژی كەت، ژبەركو دەما قوتابی بهێتە قوتابخانێ و تێر خەو نەببیت، نەشێت دروست گوھدارییا ماموستایی و وانێن خوە بكەت و لڤێرە رۆلێ دەیك و بابان گەلەكێ گرنگە، دڤێت دەمەكێ رێكخستی بۆ زارۆكێن خوە و نڤستنا وی دانن، هەكە خوە بخوازیتە وێ چەندێ ئەو ژی دەمێ نڤستنا خوە دگەل یا زارۆكێن خوە رێكبێخن ژ پێخەمەت، ئەڤ زارۆكێ هەنێ چاڤلێكرنێ بۆ دەیبابێن خوە نەكەت. لێ دەما دەیباب سپێدێ زوی نە رابوون و تا درەنگ مانە دخەو، دەما دبیتە دەواما سپێدێ یا زارۆكێن وان، ئەو نەشێن دەمژمێر حەفتی سپێدێ وان ژ خەو راكەن، ژبەركو یێن راهاتین كو درەنگ ژ خەو رابن، بوویە دێ ب زووری ئەڤ زارۆكێن هەنێ ژناڤ نڤینێن خوە دەركەڤن، تێشتەكا دروست ناخوون و بلەز و بەز دێ بەرەڤ قوتابخانێ ڤە هێن، ل قوتابخانێ ژی دێ تێبینییا وی كەین، هێشتا بدروستاهی ھشیار نەبوویە و تەركیزا وی ل سەر وانێن وی، ل سەر پەرتووكێ نینە و ل سەر دەیك و بابان پێدڤییە ستراتیژیێن باشتركرنا كوالیتییا خەوا زارۆكێ خوە بكەن و بۆ نموونە، دروستكرنا ژینگەهەكا ئارام و تاری و فێنك بۆ نڤستنا وی و گرنگە ژی شێوازێ خارنا وی رێكبێخیت، نابیت بەری نڤستنێ خوارنێن قورس بدەتێ كو بۆ هەرسكرنێ ب زەحمەت بن، فێربكە بۆ چیرۆكەكێ بێژی و ئەو دبەررا بنڤیت و دڤێت وی دەمەكێ دەستنیشانكری بۆ نڤستنێ و بۆ رابوونێ ژی هەبیت.