باهۆز سەرتیپ
لێپرسراوی كۆمیتەی هەرێمەكان و بڕیاردەری كۆمەڵەی رەنجدەرانی كوردستان لە ماوەی نێوان كۆتایی 1975 و سەرەتای 1978 ناوی تەواوی شاسوار جەلال سەعید غەنی، ناسراو بە (ئارام)ە.
لەدایكبووی ساڵی 1947 ی گەڕەكی مەڵكەندیی شاری سلێمانی لە بنەماڵەیەكی مامناوەند و بە بنەچە دەچێتەوە سەر شێخانی بەرزنجە.
ساڵی 1953 لە سلێمانی خراوەتە بەر خوێندن، لەگەڵ مەلیحە خانمی خوشكی، كە مامۆستا بووە و زوو زوو لە شوێنكەوە بۆ شوێنێكی تر گواستراوەتەوە. ساڵەكانی خوێندنی سەرەتایی هەر جارەی لە شوێنێك تەواو كردووە، پۆلی یەكەمی سەرەتایی لە ساڵی 1954 لە سلێمانی تەواو كردووە. لەگەڵ گواستنەوەی خوشكی بۆ ماوەت پۆلی سێیەمی لە ماوەت و لە ساڵانی دواتر پۆلەكانی تری لە چوارتا تەواو كردووە، هەروەها قۆناغی خوێندنی ناوەندی و ئامادەیی لە سلێمانی تەواو كردووە.
ساڵی 1964 لە كۆلێجی ئەندازیاریی زانكۆی بەغدا وەرگیرا، بەڵام بە هۆی كزی چاوییەوە نەیتوانی بەردەوام بێت لەسەر خوێندنی لەو كۆلیجە. ساڵی دواتر لە كۆلیجی بازرگانی وەرگیرا و ساڵی 1970 خوێندنی لەو كۆلیجە تەواو كرد.
پشتگیریی باڵی مەكتەبی سیاسی كردووە
مێژووی پەیوەندییكردنی بە یەكێتی قوتابیان و پارتی دیموكراتی كوردستانەوە دیار نییە، لەسەردەمی دابەشبوونی پارتی دیموكراتی كوردستان بە سەر دوو باڵدا، شاسوار جەلال بەهۆی ریشە شارییەكانییەوە و لە سۆنگەی بیروباوەڕە پێشكەوتنخوازەكانییەوە پشتگیریی باڵی مەكتەبی سیاسی كردووە.
مانەوەی لە بەغدا پاش تەواوكردنی خوێندنی زانكۆ، ئەو دەرفەتەی بۆ پێكهێنا، كە لە ناوەندە رۆشنبیری و سیاسییەكان نزیك بكەوێتەوە و مشتوماڵی ئایدۆلۆژیا شۆڕشگێڕییەكان بكات. پەیوەندیكردنی بە كۆمەڵەی رەنجدەرانی كوردستانەوە بۆ ساڵی 1970 یان 1971 دەگەڕێتەوە، پاش یەكگرتنەوەی هەردوو باڵی پارتی لە ساڵی 1971 دا، كرایە ئەندامی سكرتارییەتی یەكێتیی لاوانی دیموكراتی كوردستان و بەرپرسی لقی بەغدای یەكێتییەكە و ساڵی دواتر كرایە بەرپرسی بەشی رووناكبیری و راگەیاندنی سكرتارییەتی یەكێتیی لاوان.
بەڕێوەبردنی كەمپی خوێندكارانی ناو شۆڕش
ساڵی 1972 لە رۆژنامەی هاوكاری وەك نووسەر و رۆژنامەنووس دامەزرا، لەو ماوەیەدا هەوڵیدا لە رێی نووسینەوە بانگەشە بۆ بیر و بۆچوونەكانی بكات. لەو ماوەیەدا لەگەڵ چەند رۆشنبیرێكدا سەرقاڵی وەرگێڕانی هەندێ بابەتی چەپی شۆڕشگێڕ بوو بۆ سەر زمانی كوردی، لەوانە وەرگێڕانی نووسینەكانی سەرۆكی كۆریای باكوور كیم ئیل سونگ. ساڵی 1974 لەگەڵ دەستپێكردنەوەی شەڕ لە نێوان كورد و رژێمی بەعس، لەگەڵ ئەندامانی سكرتارییەتی یەكێتیی لاوان بارەگای یەكێتییەكەی بۆ چوان گواستەوە و پەیوەندیی بە شۆڕشەوە كرد. دواتر لەگەڵ چەند كادرێكی كۆمەڵەی رەنجدەراندا بەشداربوو لە سەرپەرشتیكردن و بەڕێوەبردنی كەمپی خوێندكارانی ناو شۆڕش لە پێنجوێن.
گەڕانەوەی بۆ سلێمانی
پاش هەرەسهێنانی شۆڕش لە ساڵی 1975 دا گەڕایەوە بۆ سلێمانی و بە گرێبەست لە بەڕێوەبەرایەتیی ئاوەدانكردنەوەی پارێزگای سلێمانی دامەزرا. لەو قۆناغەدا زۆر بە چڕی سەرقاڵی كاركردن بوو لە رێكخستنەكانی كۆمەڵەی رەنجدەراندا.
روویان لە ئێران كرد
پاش ئەو گورزەی كە دەزگا ئەمنییەكانی رژێمی بەعس لە كۆتایی ساڵی 1975 لە رێكخستنەكانی كۆمەڵەی رەنجدەرانی كوردستانیان وەشاند، ژمارەیەكی زۆری ئەندامان و كادیرەكانی رێكخستن گیران و ژمارەیەكی زۆریشیان ناچار بوون خۆیان بشارنەوە، لەم سەروبەندەشدا ئەندامانی سەركردایەتیی كۆمەڵە بۆ خۆدەربازكردن لە شاڵاوی راوەدونان و گرتن، روویان لە ئێران كرد، بەو مەبەستەی بگەنە سوریا، بەڵام هەموویان لە ئێران دەستگیر كران و دواتر رادەستی عیراق كرانەوە، بەمجۆرە كۆمەڵە بە بێ سەركردایەتی مایەوە.
سەرۆكی كۆمیتەی هەرێمەكان
شاسوار جەلال لە شوباتی 1976 دا راپۆرتێكی سەبارەت بە رەوشی ناوخۆی كۆمەڵە نووسی و تێیدا رەخنەی لە ئەندامانی سەركردایەتی كۆمەڵە گرت كە هیچ پلانێكیان بۆ ئەگەرە خراپەكان نەبووە. شاسوار جەلال كە لەم قۆناغەدا وەك سەرۆكی كۆمیتەی هەرێمەكان رەفتاری كردووە، درێژەی بە پەیوەندییەكانی لەگەڵ دەستەی دامەزرێنەری یەكێتیی نیشتمانیی كوردستان لە سوریا داوە و هەماهەنگییەكی پوختی بۆ جێبەجێكردنی پڕۆژەی دەستپێكردنەوەی خەباتی چەكداری لە كوردستان هێناوەتە دی. بە رێنمایی ئەو و ئەندامانی تری كۆمیتەی هەرێمەكان، مەفرەزە سەرەتاییەكانی دەستپێكردنەوەی خەباتی چەكداری لە پارێزگای سلێمانی پێكهێنران. خۆیشی سلێمانی بەجێهێشت و لە دێهاتەكانی قەرەداغ ژیانی پێشمەرگایەتیی دەستپێكرد. تەمەنی وەك سەركردە و وەك پێشمەرگە زۆری نەخایاند، لە 31 ی كانوونی دووەمی 1978 لە گوندی تەنگیسەری ناوچەی قەرەداغ بە دەستی جاشەكان شەهیدا كرا و هەر لەو گوندە لە گۆڕستانی شێخ مستەفا بە خاك سپێردرا.
سەرچاوە/ ئینكسكلۆپیدای یەكێتیی نیشتمانیی كوردستان بەرگی دووەم لاپەرەكانی 1261 تا 1264 چاپی چوارەم.
