حکومەتی عیراق بە نیازە لە بری بەشە خۆراک، راستەوخۆ پارە بە هاووڵاتیان بدات و راوێژکارێکی سەرۆک وەزیرانیش رەخنە لەو هەوڵە دەگرێت.
مەزهەر محەمەد ساڵح، راوێژكاری سەرۆك وەزیرانی عیراق بۆ كاروباری ئابووریی، لە گفتوگۆیەكی رۆژنامەوانیدا باسی لەوەکردووە: ئەنجومەنی وەزیران پێشنیازێكی كردووە، بەمەبەستی دەرکردنی كارتی زیرەك، بۆ ئەوەی لە بری فۆرمی خۆراك، پارە بۆ هاووڵاتیان خەرج بكرێت.
ئاماژەی بەوەشکردووە: عیراق پێویستی بە كاڵا هەیە و ئەوەش پارەی نەختینە دابینی ناكات، هەروەها ئامانجی خۆی ناپێكێت، چارەسەری نەختینە باشتر و ئاسانترە بۆ حكومەت، بەڵام لە بەرژەوەندیی هاووڵاتیاندا نییە.
ئەمەش دوای ئەوەدێت، کە پێشتر بڵاوکرابووەوە، ئەنجومەنی وەزیران نیازی هەیە لە بری مادەكانی ناو فۆرمی خۆراك، پارە بەسەر هاووڵاتیاندا دابەش بكرێت.
