دکتۆر کارزان تۆفیق بۆ کوردستانی نوێ : جەڵتەی گیرانی بۆرییەكانی خوێن كە لە جۆری یەكەمە، (85 %)ی جەڵتەی مێشك پێكدەهێنێت و نیشانەكانیشی ئەوەیە کە لێو و زمانی كەسەكە سڕ دەبێت و چاویی لێڵ دەبێت و سەرئێشەیەكی توندی دەبێت
كارزان تۆفیق پزیشکی پسپۆڕی نەخۆشییەکانی مێشک و دەمار لەبارەی گۆڕینی سیاتلی ژیان و کاریگەرییەکانی لەسەر کەمکردنەوەی جەڵتەی مێشک بۆ كوردستانی نوێ دەدوێت:
جەڵتەی مێشك سێ جۆرە
دكتۆر كارزان تۆفیق پزیشكی نەخۆشییەكانی مێشك و دەمار و ماسولكە، ئاماژە بە جۆرەكانی جەڵتەی مێشك دەكات و لەوبارەیەشەوە بە كوردستانی نوێ – ی راگەیاند: سێ جۆر جەڵتەی مێشك هەن كە بریتیین لە گیرانی بۆرییەكانی خوێن و نەزیفی خوێن لەژێر پەردەی مێشكدا، هەروەها تەقینی بۆریی خوێن هۆكارێكە بۆ مردن.
لەبارەی ئەوەی چ جۆرێكی جەڵتەی مێشك مەترسیدارە، ئەو پزیشكە دەڵێت: بەهۆی گیرانی بۆرییەكانی خوێنەوە، بەشێك لە خانەكانی مێشك دەمرن، کە كاریگەریی دەرمانەكان دوای چاکبوونەوەی كەسی تووشبوو ئاسان نابێت.
ئەمەیان مەترسیدارە و هۆکارە بۆ مردن
هەرچیی جەڵتەی تەقینی بۆرییەكانی خوێن و نەزیفی خوێنیشە کە لەژێر پەردەی مێشكدا روودەدەن، مەترسیدارە و هۆكارێكە بۆ مردنی كەسەكە کە پاش چاكبوونەوەی، كاریگەریی خراپ بەجێناهیڵێت.
لەدرێژەی روونكردنەوەكانیدا دکتۆر کارزان وتی: جەڵتەی گیرانی بۆرییەكانی خوێن كە لە جۆری یەكەمە، (85 %)ی جەڵتەی مێشك پێكدەهێنێت و نیشانەكانیشی ئەوەیە کە لێو و زمانی كەسەكە سڕ دەبێت و چاویی لێڵ دەبێت و سەرئێشەیەكی توندی دەبێت، هەرچی جەڵتەی تەقینی بۆریی خوێن و نەزیفی ژێر پەردەی مێشكیشە لە 15 % پێكدەهێنێت جەستە و پەلەكان لەكار دەكەوێت و پێویستە كەسیی تووشبوو لە نزیكترین كاتدا لەرێگەی تیشکەوە پشكنینی بۆ بكرێت و چارەسەربكرێت.
ئاماژەشی بەوە دا کە پێویستە لەرێگەی گۆڕینی ستایلی ژیان و جۆری خۆراکەوە كە بریتییە لە كەمكردنەوەی ئەو خواردنانەی چەوری و سوێری و شیرینی زۆریان تێدایە، جگە لەوەش رۆژانە نیو سەعات بۆ سەعاتێک وەرزش بكرێت و کەسی تووشبوو خۆی لە نیگەرانی دووربخاتەوە و لانیکەم شەوانە حەوت بۆ هەشت سەعات بخەوێت و گرنگیی زۆریش بە خواردنی سەوزە و میوەکان بدات.
کەمتر تووشی منداڵ دەبێت
روونیشیكردەوە هۆكاری نەخۆشیی بەرزیی رێژەی شەكر و پاڵەپەستۆی خوێن زۆرجار بۆماوەییە، لەگەڵ ئەوەشدا جگەرەكێشان و ماددە كحولیەكان هۆكارێكی دیكەن.
جەختیشی لەسەر ئەوە کردەوە کە ئێستا لە دوای رووداوەكانی هاتوچۆ، جەڵتەی دڵ بە سێیەم هۆكاری مردن دادەنرێت لە جیهاندا و زیاتریش ژنان و ئەو کەسانە تووش دەبن کە تەمەنیان لەسەروو 50 ساڵەوەیە و منداڵان زۆر بە كەمی تووشی دەبن.
لەبارەی شێوازەكانی چارەسەرییشەوە وتی: هەمان ئەو چارەسەرانەی لە وڵاتان دەكرێت لە كوردستاندا هەمان جۆری چارەسەر و دەرمان وەردەگیرێت، ئەوەی گرنگە كەسیی نەخۆش پێویستە لە ماوەیەكی زۆر كەمدا دەرمانی چارەسەر وەربگرێت، چونکە دواتر چارەسەری ئاسان نابێت.
