وەرزش لە كەركوك

رێزلێنان
 حەربی خالید، سەرۆكی نوێنەرایەتی كەركوك –ی لیژنەی ئۆڵۆمپیی عیراق، چەند رۆژێك لەمەوبەر لە بارەگای نوێنەرایەتی، خەڵاتی نوێنەرایەتی پێشكەش بە وەرزشكاری كەركوك ئونس وەلیدی یاریزانی تۆپی سەرمێزی شاری كەركوك كرد، ئەوەش لە پای ئەو ئەنجامە باشەی بەم دواییە لە پاڵەوانێتی كراوەی تۆپی سەرمێزی  یاریزانانی عیراقدا لەبەغدا بەدەستیهێنا.ئونس وەلید لەو پاڵەوانێتییەدا، توانی لە ئاستی یاریزانانی تەمەن 13 ساڵ، پلەی سێیەمی عیراق بگرێت، لەو دیدارەدا حەربی خالید پیرۆزبایی لە یاریزانەكە و راهێنەر و لقی كەركوكی ئەم وەرزشە كرد بۆ ئەم ئەنجامە باشە.
كۆبوونەوەی دەستەی گشتی یانەی شۆرجە
لەچەند رۆژی رابردوودا لە كەركوك، بەسەرپەرشتیی لیژنەی ئۆڵۆمپیی عیراق، كۆبوونەوەی ساڵانەی دەستەی گشتیی یانەی شۆرجە بەڕێوەچوو.
لە كۆبوونەوەكەدا، حەربی خالید وەك نوێنەری سەرۆكی لیژنەی ئۆڵۆمپیی عیراق ئامادەبوو، هەروەها ئەندامانی دەستەی گشتی و سەرۆك و وەرزشكارانی یانەكە و ژمارەیەك لە كەسایەتییە وەرزشییەكانی كەركوك ئامادە بوون.
سەرەتا رەزا حاجی فایەق سەرۆكی یانەی شۆرجە، راپۆرتی دارایی و كارگێڕی یانەكەی خوێندەوە، پاش گفتوگۆی نێوان ئامادەبووان، راپۆرتەكان پەسەندكران، دواتر هەر لە پەراوێزی كۆبوونەوەكەدا، بڕوانامەی رێزلێنانی تایبەت پێشکەش بە ژمارەیەك لە راهێنەر و یاریزانانی یانەكە کرا.

خولێكی بەهێزكردنی راهێنان
هەرلە كەركوك و بۆ ماوەی سێ رۆژ، خولێكی بەهێزكردنی راهێنانی یاریی لەشجوانی رێكخرا، لەم خولەدا، ژمارەیەكی زۆر لە راهێنەری خانمان و كوڕانی ئەم وەرزشە ئامادەبوون، وانەكانیش لە لایەن د.عومەر بورهان -ەوە وترانەوە، كە چەندین وانەی بەسوود بوون لە بواری زانستی راهێنان و پشودان و جۆرەكانی خۆراك و چەندین وانەی تری تایبەت بەم وەرزشە.
سەرۆكی لقی كەركوكی یەكێتیی لەشجوانی، سوپاسی یەكێتیی عیراق -ی ئەم وەرزشەی كرد بۆ رێكخستنی خولەكە و هەروەها سوپاسی وانەبێژان و بەشدار بووانی كرد، پاش تەواو بوونی خولەكەش بڕوانامە بەسەر سەركەوتووانی خولەكەدا دابەشكرا.
رزگار شوانی