ئامادەکردنی: نەی نەژاد
تیپی مۆسیقای سلێمانی یەکێکە لە تیپە دێرین و چالاکەکانی شاری سلیمانی، خاوەنی مێژوویەکی دەوڵەمەندە لەخزمەت و داهێناندا، لەدیدارێکی کورتدا بۆ دیجیتاڵ میدیای کوردستانی نوێ، دکتۆر عادل حەمە کەریم سەرۆکی تیپی مۆسیقای سلێمانی، سەبارەت بە نوێترین چالاکییەکانی تیپەکەیان وتی:
لە ئێستادا چواربەرهەمی نوێمان هەیە بۆ کلیپ کردن کە ماوەیەکی زۆرە هەوڵ دەدەین لەگەڵ هەر دەزگایەکی تایبەتمەندا بێت رێکبکەوین و کلیپ بۆ ئەو چوار بەرهەمە نوێیە بکەین، جگە لەوە بەرنامەمان هەیە بۆ کۆنسێرتێکی تایبەت کە تیایدا ئاوازی نوێ، یان کاری هونەریی نوێ بەرجەستە بکەین.
ئێمە وەکو تیپی مۆسیقای سلێمانی بیرمان لێ کردۆتەوە قەیرانێک یاخود بۆشاییەک هەیە لەم کاتەدا، بە جۆرێک هەرکەسێک دەبینیت هەڵدەستێت
گۆرانییە کۆنەکان لێدەداتەوە بۆیە چاوەڕێی دەستگیرۆین بۆ بەجێ هینانی بەرنامەی پێشکەش کردنی بەرهەمی نوێ، هەروەها سەبارەت بە دواین کارەکانی خۆیشی وتی:
دواکارم پێشکەش کردنی تویژینەوەیەک بوو بە گۆڤارێکی ئەکادیمیی و لە ئێستاشدا دوو توێژینەوەم ئامادەن، یەکێکیان توێژینەوەیەکی سەردەمییانەیە و تایبەتە بە زیرەکیی دەستکرد و کاریگەریی لەسەر میوزیک و گۆرانیی کوردی، جگە لە پرۆژەی کتێبەکانم بۆ نموونە کتێبی "رەهەندەکانی حەمە ساڵح دیلان" تاڕادەیەک ئامادەیە و سەرقاڵی "رەهەندەکانی ناسڕی رەزازی"یشم کە ئەمەیان زۆر پێوەی ماندووم و لێکۆڵینەوەیەکی وردە لەسەر هونەری (ناسڕی رەزازی)، بەرنامەشم هەیە بۆ هونەرمەندانی دیکە بەپێی توانا و بە پێی کات، هیوادارم بتوانم ئەم کارانە بەئەنجام بگەیەنم بۆ ساڵانی ئایندە.
