لە رۆژی هەشتی مارس، رۆژی جیهانیی جۆشدانی بزووتنەوەی ژناندا پیرۆزبایی گەرم لە گشت ژنانی كوردستان و جیهان دەکەین.
جوڵانەوەی ماف و یەکسانیخوازی ژنان بەشێکی سەرەکی و جەوهەری خەباتی دیموکراتی و تێکۆشانی کۆمەڵایەتی میللەتانن و هەر پێشکەوتنێک لەم جوڵانەوەیەدا خەرمان و خەزینی تێکۆشانی جیهانی دەوڵەمەند دەکەن.
یەكێتیی نیشتمانیی كوردستان وەك هەمیشە پشتیوانی بۆ خەباتی ژنان دووپاتدەکاتەوە. بەکردەوەش لەسەر رێبازەكەی سەرۆك مام جەلال بواری تێكۆشانی لە بواری حزبی و حكومیدا بۆ رەخساندون و هەوڵەکانیشمان بەردەوامه بۆ بەرفراوانترکردنی بەشدارییان لە بڕیار و داڕشتنی سیاسەتدا.
هەر بەم بۆنەیەشەوە بەتایبەتی پیرۆزبایی لە هەڤاڵانی ژن و کچانی ریزەکانی یەکێتی دەکەین کە هاوبەشێکی سەرەکی رەوتی خەباتی هەمەلایەنەی حزبەکەیانن و پێشمان وایە ژنانی یەکێتیی باشترین و چالاکترینی ژنانی کایەی سیاسی و گشتین لە کوردستاندا.
درود بۆ رۆحی ئەو ژنانە دەنێرین كە لە تێكۆشانی سیاسی و رێكخراوەییدا وەك تەواری بەرزەفڕ و هێمای ئازایەتی سەرقافڵەی داكۆكیكاری توێژەکەیان بوون .
مەكتەبی سیاسیی
یەكێتیی نیشتمانیی كوردستان
