له هه‌رێمی كوردستان 10ی ئازاری هه‌موو ساڵێك وه‌ك رۆژی جلی كوردی دیاریكراوه، دوكاندارێك باس له‌وه ده‌كات، ساڵانه به بۆنه‌ی رۆژی جلی كوردییه‌وه خواست له‌سه‌ر كڕینی پۆشاكی كوردی زۆر ده‌بێت.
كامه‌ران تۆفیق خاوه‌ن یه‌كێك له دوكانه‌كانی جل و به‌رگی ژنانە له قه‌زای شاره‌زوور به كوردستانی نوێی راگه‌یاند: هه‌رچه‌نده قه‌یرانی دارایی و دابه‌شنه‌كردنی مووچه له كاتی خۆیدا كاریگه‌ریی نه‌رێنی له‌سه‌ر كاسبكاران و دوكانداران هه‌بووه، به‌ڵام به‌راورد به بۆنه و رۆژانی تر، بۆ یادی جلی كوردی له‌لایه‌ن خانمان و خوێندكارانه‌وه خواستێكی زۆر هه‌یه له‌سه‌ر كڕینی جل و به‌رگی كوردی.
هه‌ر له‌وباره‌یه‌وه سیروان حه‌مه ره‌شید به‌رگدروو وتی: زیاتر له 30 ساڵه خه‌ریكی به‌رگدرووم، ئه‌مساڵ به‌هۆی دواكه‌وتنی مووچه بازار سست و چۆڵ بووه و خواست له‌سه‌رجلی كوردی پیاوان به‌ڕێژه‌یه‌كی به‌رچاو كه‌میكردووه، هه‌رچه‌نده من مشته‌ری خۆمم هه‌یه، به‌ڵام به گشتی خواست كه‌م بووه‌ته‌وه، ئه‌وه‌شی دێت شتێكی ساده و هه‌رزان ده‌كڕێت، شێوازی دوورینی جل و به‌رگی پیاوان چه‌ند جۆرێكی هه‌یه ئه‌وانیش ساده و مرادخانی و ستارخانی و كه‌تافی و چه‌ندین شێوه‌ی تر، جلی كوردی له‌چه‌ند پارچه‌یه‌ك پێكدێت ئه‌ویش شەڕواڵ و پشتوێن و چۆخه، هاوكات داواكارم له هاوپیشه‌كانم یاری به دیزاینی جلی كوردی نه‌كه‌ن، باشتره ئیشه‌كه‌ت بچێته ناو خه‌ڵكه‌وه گۆڕانكاری له دوورین بكه، به‌ڵام به‌ناوی مۆدیله‌وه شێوازی جلی كوردی پیاوان تێك مه‌ده.
ئەحمەد عەلی-هەڵەبجە
محه‌مه‌د عه‌بدولڕەحمان-شاره‌زوور
