قایمقامی قەزای خانەقی، دووپاتی دەكاتەوە، ئەو خێزانانەی كە بەهۆی شەڕی داعشەوە ئاوارەی ناوچەكەبوون، بەشی زۆریان قەرەبوو كراونەتەوە، ئەمەش لەكاتێكدایە پێنج گوندی سنوورەكە زیانی زۆریان بەركەوتووە، بەڵام تائێستا قەرەبوو نەكراونەتەوە.
جواد فەیزوڵڵا قایمقامی قەزای خانەقی بۆ كوردستانی نوێی خانەقی وتی: لە كۆبوونەوەماندا لەگەڵ رێكخراوی كۆچی نێودەوڵەتی داوامانكرد كە ئەو گوندانەی سنووری قەزای خانەقی کە بەهۆی شەڕی داعشەوە زیانیان بەركەوتووە، قەرەبوو بكرێنەوە.
وتیشی: 255 خێزان لە سنوری قەزای خانەقی لە شەڕی دژبە تیرۆردا كە لەساڵی 2014ەوە دەستیپێكرد، زیانی گیانی و ماددیی زۆریان بەركەوتووە.
وتیشی: ئەو گوندانە كە پێكهاتوون لە ئەحمەد هیلال و موبارەك و رەمەزان و مەردان و كاكائی، دەكەونە سنووری خانەقی-یەوە و شەهید و بریندار و ماڵوێران بوون و زیانی زۆریان پێگەیەنراوە، بەڵام تائێستا هیچ قەرەبوو نەكراونەتەوە.
جەختیكردەوە: بۆیە داوامان لە رێكخراوی نێودەوڵەتیی كۆچی جیهانی كردووە كە قەرەبوو بكرێنەوە هاوشێوەی ناوچەكانی تری دیالە.
تەها نەجم
