ئارۆ سامان
8ی مارس، بەتەنها ناتوانێت بیرمانبخاتەوە كە ژنان چیان كردووە؟، مێژووی رەنگاوڕەنگی قوربانی و پڕخرۆشی خەباتی نیشتمانیمان پڕە لە ژنانی بوێر و چاونەترس، سەدام حسێن-ی دیکتاتۆر كە بڕیاری گرتن و كوشتن و هەموو دەسەڵاتێكی خۆی بەخوێنڕشتن لەپێناوی مانەوەی خۆیدا بەكاردەهێنا، نەیتوانی هەستی خەباتگێڕانەی ژنە كوردێكی وەكو لەیلا قاسم بگۆڕێت، دایكی دواهەمین پەیامەكانی لەیلا دەگێڕێتەوە و دەڵێت: لە نامەیەكیدا کە بۆ كەسوكارەكەیی ناردووە و تیایدا وتوویەتی: «لە 12ی ئایار لەسێدارە دەدرێم، وەرن بۆ دیدەنیم، بەڵام بۆئەوەی رێگەتان پێ بدرێت، بڵێن هاتووین بۆ لای زیندانییەكی خەڵكی جەلەولا كە ناوی سەڵاح –ە».
دایكی هەروەها گێڕاویەتییەوە و دەڵێت: چوومە دیدەنی، هەر كە رێگەیان پێدام بچمە ژوورەوە، لەیلام بینی و بە دەنگێكی بەرز بانگم كرد لەیلا!. لەپشت شیشەکانی زیندانەوە یەكتریمان ماچ كرد، لەیلا زۆر بەهێز و بە ورە دیار بوو، پێیوتم: دایە خەفەت نەخۆیت بڵێیت كچەكەی وەهای لێهاتووە، راوەستە بۆت باس بكەم: سەدام حسێن لەگەڵ چەندین گەورە كاربەدەستی حكومەت هاتن بۆلام، سەدام پێی وتم چیت دەوێ بۆت دەكەم. داوای لێكردم پەشیمان ببمەوە، لە بەرامبەردا نەك هەر ئازادم دەكات، بەڵكو چیم بوێت بۆ خۆم و خانەوادەكەم دەیكات، كە سەدام قسەكانی كرد، دواتر لێم پرسی قسەكانت تەواو بوو؟ سەدام وتی: بەڵێ، هەر ئەو داوایەم لێت هەیە و تۆش چیت دەوێ بیڵێ با بۆت جێبەجێ بكەم. منیش پێموت: با پێت بڵێم من كوردم و كوردستانیم. سەدام تووڕە بوو و وتی: بەخوا ئیعدامت دەكەم - بەخوا چاوت دەردەهێنم. منیش وەڵامم دایەوە و پێم وت: «من بكوژن، بەڵام ئەو راستییە بزانن كە بە كوشتنی من هەزاران كورد لە خەوی گران بەئاگا دێنەوە. من زۆر خۆشحاڵم كە بە سەرفرازی لە رێگەی ئازادیی كوردستاندا گیانی خۆم فیدا دەكەم».
لە كۆنگرەی خوێندكارانی جیهاندا چی روویدا؟
عادل موراد، بەرپرسی ئەوكاتەی یەكێتیی قوتابیانی كوردستان لە بەغدا دەربارەی لەسێدارەدانی لەیلا قاسم كە ئەو لەو كاتەدا بە مەبەستی بەشداریكردن لە كۆنگرەی خوێندكارانی جیهان لە بۆدابێست بووە، باس لە كاردانەوەی هاوژینی سەرۆكی پێشووی چیللی (ئالێندە) دەكات و دەڵێت: «ئەو ناوی گەلی كوردی هەرگیز نەبیستبوو، ئێمە باسی كوردمان بۆ كرد و هەواڵی لەسێدارەدانی لەیلا قاسممان پێ راگەیاند، دواتر پشتیوانی لە ئێمە كرد و بەبەر چاوی نوێنەرانی عیراقەوە بە رێكخەرانی كۆنگرەكەی وت: بۆچی ناهێڵن نوێنەرانی كورد لە كۆنگرەکەدا بەناوی كوردەوە قسە بكەن؟ دیارە رژێمی عیراق رژێمێكی فاشیستە و ژنانی كورد لەسێدارە دەدات، چۆن دەبێت ژن لەسێدارە بدرێت؟ دیارە هیچ جیاوازییەك لەنێوان رژێمی پینۆچێ و عیراقدا نییە.
دەربارەی كەسایەتیی لەیلا قاسم، عادل موراد دەڵێت: «لەیلا قاسم ژنێكی ژیر و ئازا بوو، ئازادیی ژن و كوردستانی بەیەكەوە گرێدەدا، لەگەڵ جەواد هەمەوەندیدا خاوەنی عەشقێكی پاك بوون. لە تەلەفزیۆن دیمەنی دادگایی كردنەكەم بینی، شوێنەواری ئەشكەنجە بە دەموچاوی لەیلاوە دیار بوو، بەڵام زۆر سەربەرزانە، بەبێ ترس وەڵامی دادوەری دەدایە و دەیگوت: «پەشیمان نیم». لەیلا قاسم بە بەرخۆدانەكەی لە بەرامبەر رژێمی عیراق لە كاتی لێكۆڵینەوە و ئەشكەنجەدا، كەسایەتی خۆی سەلماند».
