محەمەد نەورۆڵی
لەپێناوی زیاتر خزمەتکردن بە وەرزش و وەرزشکارانی پارێزگای هەڵەبجە، یانەی وەرزشیی هەڵەبجە، بە ئیدارە و ستافێكی نوێوە، هاتۆتەوە ناو کێبڕکێ وەرزشییەکان.
شکار ئازاد ساڵح، سەرۆكی یانەی هەڵەبجە، بە كوردستانی نوێی راگەیاند: بەداخەوە ئێمە یانەی وەرزشیی هەڵەبجەمان لە خراپترین بارودۆخی ئابووری و ئیداری و وەرزشییدا وەرگرتووە، بەڵام بێ ماندوو بوون و پێشمەرگە ئاسا، شەو و ڕۆژمان خستۆتە سەریەك، تا یانەكە بەرینە ئاستێكی باشتر، بۆ ئەو مەبەستەش لە سەرجەم بەشەكانی یانەکەدا، هەنگاوی باشمان ناوە بۆ نوێبوونەوە و بەرەوپێشچوون.
وتیشی: بۆ سەرلەنوێ بنیاتنانەوەی ژێرخانی یانەی وەرزشیی هەڵەبجە، پێویستمان بە هاوكارییە، داواكارین لە هەموو لایەک، هاوكارمانبن ئەگەر بە وشەیەكی باشیش بێت.
سەرۆكی یانەی هەڵەبجە ئاماژەی بەوەشدا: ئێمە بۆخزمەتکردن و نوێ بوونەوە هاتووین، دەمانەوێت گرنگی تەواو بە وەرزش و وەرزشکاران بدەین، ئەو داهاتەشی دێتە ناو یانە، بەشێوەیەکی شەفاف و بە دەستێکی ئەمین، خزمەتی سەرجەم بەشە وەرزشیەکانی پێبکەین، هەروەها دەمانەوێت ئیدارەیەكی دڵسۆز و ماندوونەناسبین تا مێژوویەکی وەرزشیی پڕسەروەریی بنووسینەوە بۆ شارەکەمان.
