هەنگاوێكی گرنگی یارییەكانی چامپیۆنس لیگ

ئەمشەو سێشەممە و سبەی شەو چوارشەممە  11 و 12/3 ، یارییەكانی گەڕانەوەی قۆناغی 16 یانەی چامپیۆنس لیگی یانەكانی ئەوروپا دەكرێن و بە تەواو بوونی ئەم یارییانە، ئەو 8 یانەیە دەردەكەون كە بۆ قۆناغی دواتری یارییەكان سەردەكەون.
هەرچوار یارییەكەی ئەمشەو زۆر گرنگن، بەوەی یانە پاڵێوراوەكانی ئەمساڵ بۆ بردنەوەی نازناو، یارییەکانی دەكەن، لەگەڵ ئەمانیشدا، سبەی شەویش گرنگترین یاریی، دێربی مەدرید دەبێت كە ئەتلەتیكۆ مەرید و ریاڵ مەدرید دەیكەن.
یەكەم یاریی ئەمشەو، سەعات 8:45، بارسیلۆنا میوانداریی لە بەنفیكا دەكات، یاریی چوون كە لە پورتوگال كرا، سەرەڕای كرانە دەرەوەی كۆبارسی لە ناوەڕاستی تایمی یەكەمدا، بەڵام بەو كەموكوڕییەشەوە، بارسا یارییەكەی 1-0 بردەوە، یارییەكی گرنگی تر، لیڤەرپوڵ لە ئەنفیڵد میوانداریی لە پاریس سانجێرمان دەكات، لە پاریس لیڤەرپوڵ زۆر بەزەحمەت و بە تەنیا گۆڵێك یارییەكەی بردبۆوە، بۆیە لە ئەنفیڵد هەموو ئەگەرەكان لە ئارادان.
دوو یارییەكەی تری ئەمشەو، بایرن لە ئەركێكی ئاساندا و بەپشت بەستن بە بردنەوەی یاریی چوون 3-0، لە یاریگای بای ئەرینا، رووبەڕووی با.لیڤەركوزن دەبێتەوە، دووەم یارییش، ئینتەر میلان بە پشت بەستن بە بردنەوەی یاریی چوون 2-0، لە نێو یاریگای سانسیرۆ و هاندەرانیدا، رووبەڕووی فاینۆرد دەبێتەوە.
یاریی لووتكەی سبەی شەو كە دێربی مەدریدە، لە یاریگای میترۆپۆلیتانۆ – ی تایبەت بە یانەی ئەتلەتیكۆ مەدرید دەكرێت.
یاریی چوون كە لە سانتیاگۆ بیرنابیۆ كرابوو، بە بردنەوەی ریاڵ مەدرید 2-1 كۆتاییهاتبوو، لەم یارییەدا، ئەتلەتیكۆ دەبێت بە جیاوازی زیارت دووگۆڵ لە ریاڵ بباتەوە ئەوسا بۆ قۆناغی داهاتوو سەردەكەوێت، بەڵام ریاڵ هەموو جۆرە بردنەوە و یەكسانبونێك بە قازانجێتی و بەو ئەنجامانە دەگاتە قۆناغی 8 یانە.
لیل لە یاریگای خۆیدا میوانداریی ب.دۆرتمۆند دەكات، ئەم یارییە وەك ئەوە وایە، یەكەم یاریی نێوانیان بێت، چونكە یاریی چوون 1-1 بوون، بۆیە هەردووكیان هەوڵی بردنەوە دەدەن، ئەگەرچی ئەركی دۆرتمۆند تاڕادەیەک گرانە بەوەی لە دەرەوەی یاریگای خۆیدا یارییەکە دەكات.
هەرچی ئەرسناڵ و ئەستۆن ڤێللایە، بەهەموو پێوەرەكان دوو یانەی قۆناغی داهاتوون، بەوەی یاریی چوونیان لە دەرەوەی یاریگای خۆیان بردۆتەوە و ئەم یارییە لە یاریگای خۆیاندا دەكەن، بە تایبەتیش ئەرسناڵ كە بە ئەنجامێكی گەورە 7-1 یارییەكەی بردبۆوە.
سەرجەم یارییەكانی ئەمشەو و سبەی شەو بەمشێوەیە دەكرێن كە بەرامبەریان ئەنجامی یاریی چوونی نێوانیان نووسراوە:

یارییەكان

سێشەممە 11/3/2025
* بارسیلۆنا 1×0  بەنفیكا- سەعات 8:45  ی شەو.
* ئینتەرمیلان 2×0 فاینۆرد-سەعات11 -ی شەو.
* بایەر لیڤەركوزن 0×3بایرن-سەعات11 -ی شەو.
* لیڤەرپوڵ1×0پا.سانجێرمان-سەعات11 -ی شەو.

چوار شەممە 12/3/2025
* لیل 1×1 بروسیا دۆرتمۆند  -سەعات 8:45- ی شەو.
* ئە.ڤێللا 3 ×1 كلوپ بروج-سەعات11 -ی شەو.
* ئەرسناڵ 7× 1 ئایندهۆڤن - سەعات11 -ی شەو.
* ئە.مەدرید1×2 ریاڵ مەدرید -سەعات11 -ی شەو.