ئەمڕۆ بەخەمێكی قوڵەوە یادی 37 ساڵەی تاوانی دڕندانەی دژ بە گەلەكەمان دەكەینەوە كە لەشاری هەڵەبجە لە لایەن هێزەكانی رژێمی بەعسی رووخاوەوە بەرامبەر بە خەڵكی بێدیفاع و مەدەنی ئەو شارە ئەنجامدرا.
ئەو تاوانەی شۆڤێنیەكانی بەعس بەسەر ئەم شارەدا هێنایان رقێك بوو بەرامبەر رۆڵی مێژوویی هەڵەبجە كە لە جوڵانەوەی فەرهەنگی و شارستانێتی و سیاسیدا خاوەنی بیری دەوڵەمەند و پێشكەوتنخوازی كوردایەتی بوون و لە راپەرین و شۆڕشەكانی گەلەكەشماندا هەمیشە سەرمەشق بوون، بەتایبەتی لە شۆڕشی نوێی گەلەكەماندا یەكەمین مەفرەزە سەرەتاییەكانی ئەم ناوچەیە لە هەڵەبجە و شارەزوور چەكی مەردایەتیان دژی ئەو رژێمە هەڵگرت و شۆڕشیان هەڵگیرساند.
وەك چۆن هەر لە پاش راپەڕینەوە یەكێتیی نیشتمانیی كوردستان لەسەر ئەركی خۆی و دواتر لە رێگەی حكومەتی هەرێمەوە هەوڵی بێوچانی خستەگەڕ بۆ گەڕاندنەوەی سیمای ئاوەدانی و پێشكەشكردنی خزمەتگوزاری بە هەڵەبجە و خەڵكەكەی، ئەمرۆش زیاتر لە جاران و پاش بەڕەسمی ناساندنی هەڵەبجە وەك چوارەمین پارێزگای كوردستان لە لایەن پارلەمان و حكومەتی هەرێمەوە، لەپێناو ساڕێژكردنی زامەكان و باشتر قەرەبوكردنەوەی زیانلێكەوتوانی تاوانی جینۆسایدكردنی ئەم شارە تێدەكۆشێت.
هەر لەم بۆنە خەمناكەدا تەئكید دەكەینەوە سەركردایەتی یەكێتی لە رێگەی فراكسیۆنەكەیەوە لە پەرلەمانی عیراق و تیمی ئیدارەی هەڵەبجە و حكومەتی فیدراڵی، لەهەوڵی بەردەوامدان تاوەكو لە ئەنجومەنی نوێنەران پڕۆژەیاسای بەرەسمی ناساندنی هەڵەبجە وەك نۆزدەیەمین پارێزگای عیراق دوا خوێندنەوەو دەنگدانی لەسەر بکرێت و بە پێی یاسا و بنەما دەستوورییەكان گشت شایستە و مافەكانی بۆ دابین بكرێت.
تاوانی كیمیایبارانی هەڵەبجە زامێكی لە بیرنەكراوە، درود بۆ رۆحی شەهیدانی كیمیایبارانی هەڵەبجە و گشت شەهیدانی جینۆسایدی گەلەكەمان.
مەكتەبی سیاسیی
یەكێتیی نیشتمانیی كوردستان
