راپۆرتی/ رزگار شوانی
کەرکوک شارێکی فرە نەتەوەیە، لە دێر زەمانەوە بە شاری پێکەوەژیان و ئاشتی و تەبایی ناسراوە، لە رەمەزاندا هەریەک لە نەتەوەکان بە تایبەتمەندی خۆیانەوە ئەرکە ئاینییەکانیان جێبەجێ دەکەن و نزا دەکەن بۆ بەدیهاتنی ئاشتیی و ئارامی زیاتر لە وڵاتدا.
نەریتی مانگی پیرۆزی رەمەزان لە کەرکوک جیاوازە لە پارێزگاکانی دیکە، لەبەرئەوەی شارێکە چەند نەتەوەیەکی تێدا دەژی.
توێژەر و دکتۆر عەبدولکەریم خەلیفە بۆ کوردستانی نوێ وتی: مانگی رەمەزان لە ساڵانی رابردوودا تام و چێژی تایبەتی هەبوو لە رووی دابونەریتەوە خەڵکی پەیوەندییەکی باش لە نێوانیاندا هەبوو بە تایبەتی لە گەڕەکە میللییەکاندا، ئاڵوگۆڕکردنی خواردن لە نێوان دراوسێکاندا لە کاتی پارشێو، کردنی نوێژی تەراویح لە مزگەوت و حوسێنییەکاندا، کۆبوونەوەی خزم و هاوڕێکان بۆ یارییەکانی سینی و زەرف، دامە و کڵاوێن لە گەڕەکە کوردییەکاندا، هەروەها رۆڵی کەسانی خۆبەخش لە بەئاگاهێنانەوەی هاووڵاتیان لە کاتی پارشێودا ئەمانە گەرموگوڕی زیاتری دابوو بە پەیوەندیییەکان لە رەمەزاندا و سەرجەم پێکهاتەکان رێزیان لە بۆنە ئایینی و تایبەتییەکانی یەکدی دەگرت.
وتیشی: بەهۆی پێشکەوتنی تەکنەلۆژیا ئێستا ئەم دابونەریتانە فەرامۆشکراون و ساردی بە پەیوەندییەکانەوە دیارە.
هەندێک لە دابونەریتە تایبەتەکانی رەمەزان
دابونەریتە تایبەتەکان لە مانگی رەمەزاندا لە کەرکوک زیاترە نووسەر تۆفيق ئەلعەتار بۆ کوردستانی نوێ دەڵێت: هەموو ساڵێک لە سەرەتای مانگی پیرۆزی رەمەزاندا بازاڕ و شوێنە گشتییەکان دەڕازێنرێتەوە، گەرموگوڕی لە چوون بۆ مزگەوت و داخستنی چێشتخانە و چایخانەکان تا کاتی بەربانگ سیمای دیاری رەمەزانە لە کەرکوک.
وتیشی: لە رابردوودا رەمەزان حیکایەتخوان هەبوو چیرۆکە ئەفسانەییەکانی وەک لەیلا و مەجنون، شیرین و فەرهادی دەخوێندەوە لە پاش نیوەڕواندا و خەڵک گوێیان لێدەگرت چێژێکی تایبەتی هەبوو.
نووسەر مەتین عەبدوڵڵا لەبارەی نەریتەکانی رەمەزان لە کەرکوک بۆ کوردستانی نوێ وتی: ئاڵوگۆڕکردنی خواردن و شیرینی لەنێوان دراوسێکان لە بەربانگ و سەردانکردنی یەکتری دوای نوێژی تەراویح لە نەریتە جوانەکانی رەمەزان بوون لە کەرکوک، هەروەها هەندێکجار لەگەڵ مۆسیقا و گۆرانی وتن بە تایبەتی مەقامات کە لەلایەن گۆرانیبێژە بەناوبانگەکانەوە دەوترا تەپڵ و زوڕنا تاکو نزیک پارشێو بەردەوامی هەبوو، رۆژانی رەمەزان هەندێک خەڵک لە کارن و هەندێکیش دەبنە شانەی هەنگ بۆ یارمەتیدانی هەژاران.
