راپۆرتی/ هێمن ئەحمەد
لە کۆندا وەك نەریتێك هەموو شەوانی مانگی رەمەزانی پیرۆز، یاری سینی و زەرف لە گەڕەكەكانی ئیمام قاسم، بڵاخ، بەرتەكییە، موسەڵڵا، پریادی، قۆریە، بەگلەر و شاترلوو ئەم یارییە دەكرا، لەم گەڕەكانەوە بڵاوبووەوە بۆ گەڕەكەكانی دیکە و تەنانەت بۆ شاری هەولێریش.
یاری سینی و زەرف هاوشێوەی یاری (كڵاوێن و محیبس)، تەنها لە مانگی رەمەزاندا دەكرێت، یارییەکە كۆمەڵێك تایبەتمەندیی هەیە و لەگەڵ یارییەكەدا ئاهەنگ گێڕان و دەهۆڵ و زوڕنا لێدان دەست پێدەكات، گۆرانی و سەما و ئەگلەنجە و دابەشكردنی شیرینی و بەسەربردنی شەو تا دەمەوبەیان.
کۆبوونەوەی گەنجان بۆ یاریکردن
سینی و زەرف پێكدێت لە (سینیەك و 11 زەرف یان كوپ، كوپەكان لە برۆنز + میروویەك)، یارییەکە لە دوای بانگی مەغریب دەستپێدەکات.
عەمار عەلی دانیشتووی یەكێك لە گەڕەكە عەرەب نشینەكانی كەركوكە دەڵێت: چەند هاوڕێیەكین هەموو ساڵێک لە شەوانی رەمەزاندا سەردانی یەكتری دەكەین بۆ یاری سینی و زەرف کردن، بووینەتە گروپی عەرەبی و گروپی كوردی و توركمانیشمان لە گەڵدایە، زۆرجاریش گروپەكان ئاڵۆگۆڕ لەنێوان یەکتردا دەکەین.
زۆربەی جار تیپەكان خۆیان گۆرانیبێژ و دەهۆڵ و زوڕنا لەگەڵ خۆیان دەبەن بۆ هاندانی یاریزانەكان، هەرتیپێك بریتییە لە 3 بۆ 4 كەس و بەرامبەر یەكتری دادەنیشن و هاندەرانیش لە دەوریان دادەنیشن، جاری وا هەیە، تیپی گەڕەك دەبنە چەندین بەشەوە، بەمانایەكی تر تیپی سەرەكی و چەند تیپێكی تر.
مەریوان عارف دانیشتووی سویدە بە سەردان گەڕاوەتەوە كەركوك و وتی: ساڵانە چەند رۆژێك پێش مانگی رەمەزان دەگەڕێمەوە بۆ کەرکوک، شەوانە یاری سینی و زەرف دەکەم و كاتێكی خۆش لەگەڵ هاوڕێکانم بەسەردەبەم.
سامی محەمەدی تەمەن 57 ساڵ وتی: لە پێش شەڕی ئێران و عیراق، ئەم یارییەمان لە گەڕەكی حەلواچییەكان دەكرد، بەڵام ئێستا ناتوانم یاریی بكەم، لەبەرئەوەی هاوتەمەنی خۆم لەگەڵدا نییە و هەموو شتێك كاتی خۆی خۆشە.
چۆنییەتی یارییەکە
یارییەكە بە سێ گێم دەکرێت و هەر تیپێک بە کۆکردنەوەی 101 خاڵ براوەیە.
جۆری یارییەكە، سینیەكە شیلەی لێدەدرێت بۆئەوەی زەرفەكان (كوپەكان) بگرێت، میروەكە كەپێی دەڵێن (بونجق) دەخرێتە ژێر یەكێك لە زەرفەكان، ئەمە لەژێر پارچە قوماشێك دەکرێت بۆئەوەی كەس نەیبینێ.
دواتر دەخرێتە بەردەم تیپی بەرامبەر بۆ دۆزینەوەی، ئەو یانزە زەرفە دوانی گوڵە و یەكێكیان دوو خاڵ دەژمێردرێت، یەكێك لە تیپەكەی بەرامبەر سینییەكە بۆ لای خۆی رادەكێشێت و راوێژ بە هاوڕێكانی دەكات، دواتر بۆی هەیە، بە گوڵەكان دەست پێبكات یان زەرفەكان فت بكات، ئەگەر زەرفێكی دەستنیشان كرد و وتی: ئەم دوو (بونجقە) دەرچێت ئەوە دوو خاڵ حساب دەكرێت.
لە شەوانی رەمەزاندا بەشێک لە گەنجان بە تایبەت بۆ کردنی یاری سینی و زەرف دەچنە کافتریاکان.
قەرەباڵغی کافتریاکان
خاوەنی كافتریای شەوانی شارەكەم بۆ كوردستانی نوێ وتی: لە مانگی رەمەزاندا کافتریاکەمان زیاتر قەرەباڵغ دەبێت و گەنجان دێن یاری سینی و زەرف دەکەن.
بە مەبەستی پاراستنی ئارامی شارەکە پۆلیس چاودێری ئەو شوێنانە دەكات كە گەنجان تیایدا كۆدەبنەوە بە تایبەت كافتریا و چایخانەكان.
عەمید سابیر محەمەد بەڕێوەبەری راگەیاندنی پۆلیسی كەركوك، بە كوردستانی نوێی راگەیاند: هەر شوێنێك قەرەباڵغ بێت دەستبەجێ مەفرەزەكانمان دەگەنە شوێنەکە بۆ چاودێریكردن و رێگریکردن لە دروستبوونی ئاژاوە و پشێوی، هەرکەسێک کاری لەوشێوەیە بکات دەستگیر دەکرێت.
وتیشی: داوا لە هاووڵاتیان دەکەین هاوكاری هێزەكانی پۆلیس بن و لە بوونی هەر ئەگەرێكی نەخوازراو ئاگادارمان بكەنەوە.
