نەرمین عوسمان محەمەد
ساڵانە لە مانگی پیرۆزی رەمەزاندا راگەیاندنەکان چەندین بەرنامەی جۆراو جۆر ئامادە و پێشکەش دەکەن، هەر کەناڵێک بەپێی دید و توانای خۆی کۆمەڵێک بەرنامەی تایبەت پێشکەش بە بینەرانی دەکات.
یەکێک لەو کەناڵانەی هەموو ساڵێک کۆمەڵێک بەرنامەی نایاب پێشکەش بە بینەرانی دەکات (کوردسات)ە، تا رادەیەکی زۆر ئەم کەناڵە توانیویەتی جێگەی رەزامەندی بینەرانی بێت، ئەوەی لەمساڵدا زیاتر جێگەی دەستخۆشی و پێزانینە لە رەمەزاندا بەرنامەی (هەڵوێست)ە توانیویەتی کۆمەڵێک تایبەتمەندی باش بۆخۆی بەدەست بهێنێت و جێگەی خۆی لە دڵی بینەرانیدا بکاتەوە، چۆن؟
تایبەتمەندی بەرنامەکە
یەکەم تایبەتمەندی ئەو بەرنامەیە ئەوەیە کۆنسێپتێکی کەلتوریی و کۆمەڵایەتی بەرزی هەیە، دەگەڕێت بە دوای بەها کۆمەڵایەتییە بەهێزەکان لە نێو کۆمەڵگەی کوردیدا، چاودێریی مانەوە و پەرەسەندنیان دەکات، لە رێگەی نواندن لە ماوەیەکی زەمەنی کورتدا و هەڵسەنگاندنی کاردانەوەی هاووڵاتیان بەرامبەر دیاردەکە.
هاوکات کاتی پێشکەشکردنی بەرنامەکە کاتێکی زۆر گونجاوە بۆ خێزان کە ئەویش کاتی بەربانگ و کۆبوونەوەی هەموو ئەندامانی خێزانە، ئەمەش وادەکات دایکان و باوکان هانی منداڵەکانیان بدەن بۆ پاراستنی بەها کۆمەڵایەتی و کەلتورییەکان و بەردەوامبوون لە رێزگرتن لێیان، ئەمەش بە راستی ناوەڕۆکی کاری میدیایی و ئەرکێکی گرنگی میدیایە لەناو کۆمەڵگەدا و کارکردن لە سەری جێگەی دەستخۆشی و پێزانینە.
مۆرکی کوردیی بە بەردا کراوە
لەوانەیە بینەرێکی وریا و زمانزان کە ئاگاداری کەناڵەکانی دیکەی عەرەبی و جیهان بێت بڵێت ئەم بەرنامەیە بیرۆکەکەی لە بەرنامەیەکی عەرەبییەوە وەرگیراوە کە چەند ساڵێکە بە سەرکەوتوویی پێشکەش دەکرێت، لە وەڵامدا دەڵێین بەڵێ راستە بەرنامەکە وەرگیراوە، بەڵام بە شێوەیەکی زۆر جوان و گونجاو بەرنامەی هەڵوێست مۆرکی کوردیی بە بەردا کراوە و لەگەڵ کۆمەڵگەی خۆماندا گونجێنراوە، زۆر ئاساییە ئەو بابەتانەی کە سوودیان بۆ کۆمەڵگە هەیە لە هەر کەناڵێکی دیکەی جیهانی یاخود عەرەبیەوە بێت وەربگێڕدرێت و بە مۆرکێکی کوردیی بڵاوبکرێتەوە.
ماوەتەوە بە ستافی بەرنامەکە بڵێین دەستانخۆش بێت بۆ کارکردن و هەوڵدانتان لە پێناو کۆمەڵگەی کوردی و ماندوبوونتان جێگەی رێز و پێزانینە، هیوای بەردەوامیتان بۆ دەخوازین و دڵمان لەلای ئەو ئەکتەرانەتانە کە لە میانی پێشکەشکردنی ئەزموونە کۆمەڵایەتییەکاندا بەر هێرش و ئازاردانی کەسانی خەمخۆر و بە هەڵوێست دەکەون، سوپاس بۆ دەزگای میدیایی کوردساتیش کە یەکێکە لەو کەناڵانەی بە ئەمەکەوە هەوڵی پاراستنی کەلتور، مێژوو و بەهاکانی کۆمەڵگەی کوردی دەدات.
