کەرکوک، هێمن ئەحمەد
ئاسۆ مامەند سەرپەرشتیاری كەركوك – سەڵاحەدینی یەكێتیی نشتیمانیی كوردستان، بە یاوەری ژمارەیەك لە ئەندامانی سەركردایەتی، لە شەوانی رەمەزانی پیرۆز، سەردانی چایخانە و كافیریاكانی گەڕەكەكانی كەركوك دەكات و لەگەڵ گەنجانی شارەكە یاری سینی و زەرف و دەكات و كاتی خۆش بەسەردەبن.
وەكو نەریتێك، ساڵانە، لە مانگی رەمەزانی پیرۆزدا لە دوای نوێژی تەراویح، گەنجان روو لە چایخانە و كافتریاكان دەكەن بۆ یاری سینی و زەرف، ئەم یارییەش تەنیا لەو مانگە پیرۆزە دەكرێت.
سینی و زەرف پێكدێت لە (سینیەك و 11 زەرف یان كوپ، كوپەكان لە برۆنز + میروویەك).
زۆربەی جار تیپەكان خۆیان گۆرانیبێژ و دەهۆڵ و زوڕنا لەگەڵ خۆیان دەبەن بۆ هاندانی یاریزانەكان و دەستدەكەن بە هەڵپەڕكێ، هەرتیپێك بریتییە لە 3 بۆ 4 كەس و بەرامبەر یەكتری دادەنیشن و هاندەرانیش لە دەوریان دادەنیشن، جاری وا هەیە، تیپی گەڕەك دەبنە چەندین بەشەوە، بەمانایەكی تر تیپی سەرەكی و چەند تیپێكی تر.
